Bu məktəbdə 1 və 2-ci siniflərə dərslər birlikdə keçilir - VİDEO

Birinci və ikinci siniflər birlikdə dərs keçirlər.

Milli.Az Xəzər TV-yə istinadən bildirir ki, müəllim 22 dəqiqə birinci sinif, digər 22 dəqiqədə isə ikinci siniflə məşğul olur.

Qəbələnin Tikanlı kənd orta məktəbindəki bu vəziyyət valideynləri narazı salıb. Onlar bildirirlər ki, sinif otaqları ola-ola iki sinifə bir yerdə dərs keçilməsi yolverilməzdir.

O da qeyd olunub ki, məktəbdə lazımi qədər müəllim də var. Hazırkı vəziyyətdə isə şagirdlər dərsləri qavraya bilmirlər.

Məsələ ilə bağlı Şəki-Zaqatala Regional Təhsil İdarəsindən "Xəzər Xəbər"ə bildirildi ki, Nazirlər Kabinetinin müvafiq qərarına əsasən, ümumi təhsil müəssisələrinin ibtidai siniflərində şagirdlərin sayı 10 nəfərdən az olduqda həmin siniflərin komplekt qaydada təşkili nəzərdə tutulur. Qərara uyğun olaraq, komplekt siniflərdə şagirdlərin ümumi sayı 18 nəfəri keçməməlidir. Hazırda Tikanlı kənd tam orta məktəbinin I sinfində 9, II sinfində isə 9 nəfər şagird təhsil alır. Bu səbəbdən də qeyd olunan normativ tələblərə uyğun olaraq I və II siniflər komplekt qaydada təşkil edilib.

Komplekt siniflərdə tədris prosesi xüsusi metodika əsasında həyata keçirilir.

Daha ətraflı videomaterialı təqdim edirik. 

Milli.Az