PUL
Son dövrlərdə qızılın qiyməti yeni bir rekord qıraraq 3200 dolları keçib və bu, investorlar arasında böyük marağa səbəb olub. Bakı vaxtı ilə 02:48-də qiymətli metalın unsiyası 3212 dollar səviyyəsinə çatıb. Qızılın qiymətindəki bu sürətli artım son illərdə daha çox diqqət çəkməyə başlayan qlobal iqtisadi qeyri-müəyyənliklər və ticarət müharibələri ilə əlaqələndirilir.
Milli.Az xəbər verir ki, analitiklər hesab edirlər ki, bu qiymət artımının əsas səbəblərindən biri ABŞ Prezidenti Donald Trampın tətbiq etdiyi ticarət tarifləri və xarici iqtisadi əlaqələrdəki gərginliklərdir. Trampın xarici siyasətindəki qeyri-sabitlik və yeni tariflər, xüsusilə Çin ilə olan ticarət mübahisələri dünya bazarlarında qeyri-müəyyənliyə səbəb olub. Belə şəraitdə investorlar iqtisadi təhlükəsizliklərini təmin etmək üçün ənənəvi olaraq daha etibarlı və qorunan aktivlərə o cümlədən qızıla üz tuturlar.
Bundan əlavə qlobal iqtisadiyyatda baş verən digər amillər mərkəzi bankların pul siyasətləri və inflyasiya narahatlıqları da qızılın qiymətinə təsir edən əsas faktorlardandır. Hazırda dünya bazarında baş verən hər hansı bir iqtisadi və siyasi gərginlik qızılın dəyərini artırmağa səbəb olur, çünki bu qiymətli metal investorlar tərəfindən "təhlükəsiz liman" olaraq qəbul edilir. Bu səbəbdən qızılın qiymətinin daha da artması gözlənilir.
"Görünməmiş ticarət gərginliyi ABŞ dollarına inamsızlığı və təhlükəsiz aktivlərə tələbi artırdığından, hazırda qızıl bazarda ən yaxşı aktivdir", - deyə analitiklər qeyd edirlər.
Aysel Əkbər
Milli.Az
Digər maraqlı xəbərlər Milli.Az-ın Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin!
.jpg)
.jpg)
.png)
