Trampın elan etdiyi qərar qüvvəyə mindi - İqtisadi gərginlik davam edir

ABŞ Prezidenti Donald Trampın açıqladığı gömrük vergiləri rəsmi şəkildə qüvvəyə minib və bu qərarın dünya ticarətində ciddi dalğalanmalara səbəb olacağı gözlənilir.

Milli.Az xəbər verir ki, aprel ayının 2-də Tramp yeni gömrük tariflərini elan edib. Əvvəlcə bütün ölkələrə 10 faiz dəyərində ümumi gömrük vergisi tətbiq olunub və bu qayda 5 apreldən qüvvəyə minib. Bu gün isə ölkələrə xüsusi olaraq təyin edilmiş qarşılıqlı tariflər tətbiq olunmağa başlayıb. Çinlə bağlı isə xüsusi bir qərar verilib. ABŞ, bu ölkədən gələn mallara əlavə olaraq 50 faiz vergi tələb edir və bununla ABŞ-nin Çin məhsullarına tətbiq etdiyi ümumi gömrük vergisi faizi 104-ə çatıb.

Çin də ABŞ-nin bu qərarına cavab olaraq 10 apreldən etibarən ABŞ mallarına eyni - 34 faiz - gömrük vergisi tətbiq edəcəyini bildirib. Çin bununla kifayətlənməyib, ABŞ-nin təhdidlərinə qarşı çıxacağını və öz maraqlarını sonadək qoruyacağını bəyan edib. Çin rəsmiləri ABŞ-nin bu addımını "şantaj" adlandıraraq belə davranışların qəbuledilməz olduğunu vurğulayıblar.

Donald Tramp açıq şəkildə xəbərdarlıq etmişdi ki, əgər hansısa ölkə ABŞ-nin vergilərinə cavab olaraq eynisini edərsə, həmin ölkəyə qarşı daha sərt vergilər tətbiq olunacaq. Çin 34 faizlik vergini geri çəkmədiyinə görə, ABŞ da söz verdiyi kimi, 50 faiz əlavə vergi qərarını 9 apreldə reallaşdırıb.

Yeni vergilər yalnız Çinlə məhdudlaşmayıb. Avropa İttifaqına 20 faiz, Vyetnama 46 faiz, Yaponiyaya 24 faiz və bir sıra digər ölkələrə də müxtəlif faiz dərəcələrində əlavə tariflər tətbiq olunub. Türkiyə və Azərbaycan isə sadəcə 10 faizlik ümumi gömrük vergisi tətbiq olunan ölkələr arasındadır.

Hazırda dünya bazarlarında narahatlıq müşahidə olunur. İqtisadçılar bu gedişatın dünya iqtisadiyyatında sabitliyi poza biləcəyindən ehtiyat edirlər. ABŞ və Çin arasında başlayan bu gömrük müharibəsinin sonu hələ görünmür.

İslam
Milli.Az