"Bitcoin" və altkoinlər niyə ucuzlaşdı?

Son məlumatlara görə, "Bitcoin"in (BTC) 28 mart tarixinə qədər 75 min dollara enmə ehtimalı 22%-ə yüksəlib. Bu göstərici bir həftə əvvəl 10% idi. ABŞ-ın Kanada, Meksika və Çinə tətbiq etdiyi yeni rüsumlar və inflyasiya narahatlığı kriptovalyuta bazarında dalğalanmalara səbəb olub.

Milli.Az xəbər verir ki, son dörd gündə "Bitcoin" 11% dəyər itirərək 93 min dolların, "Ethereum" (ETH) isə 2 min 200 dolların altına düşüb (Hazırda 95 min dollar səviyyəsində ticarə edir). Mütəxəssislər bildirirlər ki, texniki göstəricilərlə yanaşı, qlobal iqtisadi hadisələr də bu azalmaya təkan verib.

Qlobal iqtisadi qeyri-müəyyənliklər və rüsumların təsiri  

ABŞ-ın ticarət tərəfdaşlarına tətbiq etdiyi əlavə vergilər idxal mallarının qiymətini artırır. Xüsusilə Çin üçün 10%, Meksika və Kanada üçün isə 25% əlavə rüsumlar inflyasiya təzyiqlərini gücləndirir. Bu vəziyyət mərkəzi bankların faiz endirimi gözləntilərinin azalmasına və nəticədə ABŞ dollarının dəyər qazanmasına səbəb olub. Dolların güclənməsi isə qlobal likvidliyin azalması ilə birlikdə riskli aktivlər hesab edilən kriptovalyutalara mənfi təsir edib.  

"Derive" analitikləri rüsumların istehlakçı qiymətlərinə təsir edəcəyi ilə bağlı xəbərdarlıq ediblər. "Bitwise"ın Avropa üzrə məsul şəxsi Andre Draqoş pul təklifindəki azalmanın maliyyə bazarlarında şok effekti yarada biləcəyini bildirib. ABŞ prezidenti Donald Trampın elan etdiyi yeni idxal rüsumları həm maliyyə bazarlarına, həm də kriptovalyutalara təzyiq göstərib. Rüsumların qlobal tədarük zəncirlərinə və inflyasiyaya təsiri investorların risk algısını artırıb.  

Kriptovalyuta bazarı, adətən, makroiqtisadi hadisələrə sürətli reaksiya verir. Trampın rüsum açıqlamasından sonra "Dogecoin" və "Shiba Inu"da baş verən satış dalğası bu vəziyyəti təsdiqləyir. Eyni zamanda, qlobal fond bazarlarındakı eniş tendensiyası da kriptovalyutalara olan tələbi müvəqqəti olaraq zəiflədib.  

Texniki analiz və mütəxəssis proqnozları  

"Bitcoin" qrafiklərində meydana gələn ikili zirvə forması 75 min dollar hədəfini göstərir. Bu texniki siqnal bazarda satıcıların üstünlük təşkil etdiyini göstərir. Artur Heys kimi bəzi analitiklər isə bu azalmanın müvəqqəti olduğunu və daha sonra yeni bir artım dalğasının başlaya biləcəyini bildirirlər. Heysə görə, "Bitcoin" 75 min dollar səviyyəsinə düşdükdən sonra daha güclü bir bərpa prosesi keçə bilər.  

ABŞ Qiymətli Kağızlar və Birja Komissiyasının (SEC) "Dogecoin", "Solana" (SOL), "XRP" və "Litecoin" (LTC) ilə bağlı tənzimləmə addımları bazarlarda hərəkətlilik gözləntisini artırıb. Bu aktivlərin rəsmi təsdiq alması kapital axınlarını gücləndirə bilər. ABŞ Federal Ehtiyat Sisteminin (Fed) mümkün müsbət müdaxilələri də kriptovalyuta bazarında inamı bərpa edə bilər.  

Likvidlik azalması və fyuçers bazarında geriləmə  

Son 24 saat ərzində "Dogecoin"də milyonlarla dollarlıq likvidasiya əməliyyatı həyata keçirilib. "Shiba Inu"da isə likvidasiya həcmi nisbətən aşağı qalsa da, qiymət azalma tendensiyasını davam etdirib. Likvidasiyaların artması investorların stop-loss əmrlərini tetikləyərək satış təzyiqini daha da gücləndirib.  

Fyuçers bazarı göstəriciləri açıq mövqelərin sürətlə azaldığını göstərir. "Dogecoin"də 33%, "Shiba Inu"da isə 46%-lik azalma bu aktivlərə olan inamın zəiflədiyini əks etdirir. Bazar iştirakçıları ticarət həcminin azalmasını volatilliyin artacağına işarə kimi qiymətləndirirlər.  

Kriptovalyuta bazarında likvidlik azalması, adətən, qiymət hərəkətlərinin kəskin olduğu dövrlərdə baş verir. Mövcud vəziyyət investorların qısamüddətli spekulyativ əməliyyatlardan çəkinməli olduğuna işarə edir./valyuta.az

Milli.Az