“Baharın rəngləri” sərgisinə qəbul elan olundu

Gəncləri təbiətlə daha yaxından təmasa sövq etmək, ilin müxtəlif fəsillərində onun əsrarəngiz gözəlliyini nümayiş etdirmək və ətraf mühitin qorunmasına marağı artırmaq məqsədilə "Təbiətlə təmasda ol, əsrarəngizliyi təsvir et!" şüarı altında "Baharın rəngləri" adlı yaradıcılıq sərgisinə start verilib.

Sərgi Azərbaycan Rəssamlar İttifaqı, Azərbaycan Dövlət Rəsm Qalereyası, Xətai Uşaq Sənəti Qalereyası və Xətai Sənət Mərkəzi tərəfindən təşkil olunur.

Layihəyə dəstək verən qurumlar sırasında Azərbaycan Dövlət Rəssamlıq Akademiyası, Azərbaycan Televiziya və Radio Verilişləri QSC, Xətai rayon İcra Hakimiyyəti və Naxçıvan Muxtar Respublikası Rəssamlar Birliyi yer alır.

Sərgiyə bahar mövzusunda peyzaj əsərləri qəbul edilir. Tövsiyə olunan mövzular arasında baharın yaratdığı əhval-ruhiyyə, ətraf mühitdə yaz mənzərələri, təbiətin oyanışı, xəyali bahar səhnələri, həmçinin flora və fauna motivləri yer alır.

Əsərlərin qəbulu üçün son tarix 7 aprel 2026-cı ildir. Müraciətlər [email protected] elektron ünvanına göndərilməlidir. İştirakçılar təqdim etdikləri əsərin fotosunu, adını, ölçü və texnikasını, təvəllüd tarixini, əlaqə məlumatlarını və ad-soyadlarını qeyd etməlidirlər. Natamam məlumatlarla göndərilən müraciətlər qəbul olunmayacaq.
Sərgidə 8-21 yaş arası iştirakçılar ödənişsiz şəkildə iştirak edə bilərlər. Əsərlərin ölçüsü 30x40 sm-dək olmalıdır. Ümumilikdə seçilən 100 əsər sərgilənəcək, onlardan 30-u isə Xətai Uşaq Sənəti Qalereyası məkanında üç həftə ərzində nümayiş olunacaq.
Təşkilatçılar iştirakçılardan fərdi yanaşma, şəxsi duyğu və düşüncələrin əks olunduğu orijinal əsərlər gözlədiklərini bildirirlər. Sərgidə əsəri nümayiş olunan müəlliflər sertifikatla təltif ediləcək.

Əlavə məlumat üçün: 051-310-74-01 (telefon/WhatsApp).

İnformasiya dəstəyi - Trend.Az, Day.Az, Milli.Az, Azernews.Az