Təranə Muradovanın Azerbaijan Dance Festival çərçivəsində keçirilən “Night of the Dancing Diamonds” gecəsində möhtəşəm çıxışı - VİDEO - FOTO

Möhtəşəm Azerbaijan Dance Festival çərçivəsində JW Marriott Absheron Baku otelində dünyanın ən yaxşı rəqs cütlüklərinin çıxış etdiyi unikal və parlaq gala-şou - "Night of the Dancing Diamonds" (Rəqs edən brilyantların gecəsi) keçirilib.

Gecənin kulminasiya anı Azərbaycanın Xalq artisti, əfsanəvi rəqqasə və xoreoqraf Təranə Muradovanın səhnəyə çıxışı olub. Bu möhtəşəm rəqs axşamı məhz onun yubileyinə həsr olunub.

Təranə Muradova öz müəllif quruluşunda müasir bal rəqsi elementlərini milli rəqs üslubu ilə zərif şəkildə birləşdirərək təqdim edib. Bu mədəniyyətlərin və üslubların sintezi səhnəni bir sehrli məkana çevirdi - burada ənənə ilə müasirlik, zərifliklə güc, Şərqlə Qərb qovuşurdu.

Tamaşada altıqat dünya çempionu, əməkdar idman ustası Eldar Cəfərov və dünya və Avropa çempionu, xoreoqraf-quruluşçu Denis Taqintsev iştirak ediblər. Sənətkarlar Azərbaycanın Xalq artisti Emin Ağalarovun musiqisi altında ağ-qara geyimdə səhnəyə çıxaraq plastik və ritm harmoniyasını yaratdılar.

Tamaşaçılar üçün bu gecə bir sənət kəşfi oldu. Təranə Muradova, uzun illər boyu Azərbaycanı milli və xalq rəqsləri ilə beynəlxalq arenada tanıdan sənətkar, bu dəfə müasir və dinamik rəqs ritmlərində tam yeni bir ampluada səhnəyə çıxdı. Hər bir addımı sənətə olan sevginin səmimi ifadəsinə çevrildi.

60 yaşlı Təranə Muradovanın bu möhtəşəm çıxışı bir daha sübut etdi ki, yaradıcılığın yaşı yoxdur. O, sanki səhnədə uçurdu - yüngül, parlaq, daxili işıqla dolu. Tamaşaçılar onun çıxışını ayaqüstə alqışlarla, güllərlə və səmimi sevgiləri ilə qarşıladılar. Bu, həqiqətən sehrli bir an idi! (videonu mətnin sonunda izləyə bilərsiniz).

Festivalın təşkilatçıları - Azərbaycan Rəqs Şurası (AZDC), onun rəhbəri, Azərbaycanın Xalq artisti, Bakı Xoreoqrafiya Akademiyasının prorektoru Təranə Muradova və Smooth & Rhythm Dance Style (SRDS) şirkəti, qurumun təsisçisi və prezidenti Olqa Krasnyanskayanın rəhbərliyi ilə fəaliyyət göstərib.

Festival çərçivəsində bir neçə gün ərzində WDC AL World Championships, WDC European Championships, Pro-Am World Cups kimi nüfuzlu beynəlxalq yarışlar keçirilib. Yarışlarda Ballroom, Latin və Smooth kateqoriyalarında solo və cüt rəqqaslar - uşaqlardan və yeniyetmələrdən tutmuş böyüklər, peşəkarlar və Pro-Am iştirakçılarına qədər bütün yaş qrupları çıxış ediblər.

İnformasiya dəstəyi - Trend.Az, Day.Az, Milli.Az, Azernews.Az