Mədəniyyət

"Dəlinin qeydləri" monotamaşası Moldovaya festivala yollanacaq - FOTO

15 İyun 2024 15:38

Baxış: 1 392

Azərbaycan Dövlət Milli Gənc Tamaşaçılar Teatrı 24-30 iyun 2024-cü il tarixlərində Moldovanın Kişinyov şəhərində keçiriləcək "MildFest" Beynəlxalq Teatr Festivalında N.Qoqolun "Dəlinin qeydləri" mono tamaşası ilə iştirak edəcək.

31 illik səhnə fəaliyyətini uğurla davam etdirən, müxtəlif illərdə nüfuzlu beynəlxalq festivallarda uğurla çıxış edən səhnə əsərinin quruluşçu rejissoru Xalq artisti Cənnət Səlimova, quruluşçu rəssamı Lətifə Quluzadədir.

Azərbaycan Teatr Xadimləri İttifaqının dəstəyi ilə 28 iyun saat 16:00-da Xarmelin adına Dövlət Gənclər Teatrında baş tutacaq tamaşada Poprışşin rolunda Əməkdar artist Şövqi Hüseynov çıxış edir.

Kimsə tərəfindən saya alınmayan müfəttiş Poprışşin sosial ədalətsizliyi aradan götürmək üçün vəzifəcə özündən çox üstün olan rəisinin qızı ilə evlənmək qərarına gəlir. Bu dəlinin sayıqlamalarında, o, İspaniyanın kralı, dünyanı idarə edən, nurlu şəxsiyyətə çevrilir. Poprışşin dünyasını çoxdan dəyişmiş anasının səsini eşidir. Lakin bu səs də xəstə varlığın ruhunu xilas edə bilmir. Çünki onun səsini yaşadığı bu dünyanın adamları da eşitmirlər.