Filarmoniyanın “Gənclərə dəstək” layihəsi iştirakçıları İstanbulda konsertlə çıxış etdi - FOTO

Bildiyiniz kimi, 1 iyun Uşaqların Beynəlxalq Müdafiəsi Günü bütün dünyada qeyd olunur. Bu əlamətdar gün ilə bağlı bir sıra tədbirlər, konsertlər  təşkil olunur. M.Maqomayev adına Azərbaycan Dövlət Akademik Filarmoniyası da bu günə xüsusi diqqətlə  yanaşır. Hər il olduğu kimi bu ildə 1 iyun tarixində Filarmoniyanın   Kamera və Orqan Musiqisi Zalında "Uşaqların sevinci" adlı konsert təşkil olunmuşdur. Tədbirdə müxtəlif yaş kateqoriyalarında  olan gənc musiqiçilər konsert proqramı ilə çıxışlar etmişdirlər. Bu tədbir Filarmoniyanın "Gənclərə dəstək" layihəsinin iştirakçıları ilə Türkiyə Cümhuriyyətinin İstanbul şəhərində  silsilə konsertlərlə davam etmişdir. 

Belə ki, "Gənclərə dəstək" layihəsinin İstanbul şəhərindəki konserti  09 iyun 2024-cü il tarixində Milli Təhsil Nazirliyi Bakı Sənət Akademiyasında təşkil olunmuşdur. Konsert böyük maraqla qarşılanmışdır. İfa olunan hər bir əsər uzunsürən alqışlarla müşayiət olmuşdur. Gənc musiqiçilər həm milli həmdə dünya klassiklərinin əsərlərinə müraciət edərək, uzun müddət yadda qalan konsert proqramı ilə çıxış etmişdirlər.  Xüsusi olaraq qeyd etmək istəyirik ki, Uşaqların Beynəlxalq Müdafiəsi Gününə həsr olunmuş  "Gənclərə dəstək" layihəsinin  bu artıq ikinci xarici ölkədə çıxışıdır. 2023- ildə də bu əlamətdar günə həsr olunmuş konsert Gürcüstanın Tbilisi şəhərində təşkil olunmuşdur. Layihənin gözəl ənənəyə çevrilən bu çıxışları ümid edirik ki mütəmadi olaraq davam edəcəkdir. Gənc musiqiçilərimizin Azərbaycan mədəniyyətini, incəsənətini təbliği uğurla davam edəcəkdir.

9 iyun İstanbul şəhərində Bakı Sənət Akademiyasında keçirilən konsertdə respublika və beynəlxalq müsabiqələr laureatları - Yasəmən Umudova (piano), Camal Əliyev (piano), Nuray Həsənli (piano), Ayşen Umudova (piano), Adnan Kərimli (zərb aləti), Fərəh Əliyeva (piano), Milay Məhərrəmli (vokal) çıxış etdilər.
Konsertin təşkilatçı 
Türkiyə Cümhuriyyəti Milli Təhsil Nazirliyi Bakı Sənət Akademiyası Musiqi məktəbinin qurucusu və direktoru Raziye Hüseynova tərəfindən iştirakçılar üçün hazırlanmış xatirə hədiyyələri, suvenirlər xoş bir əlavə idi.

Xatırladaq ki, "Gənclərə dəstək" layihəsi Müslüm Maqomayev adına Azərbaycan Dövlət Akademik Filarmoniyasının həyata keçirdiyi layihədir və əsas məqsədi Azərbaycanda gənc istedadların üzə çıxarılması və dəstəklənməsidir. Layihə ideyasının müəllifi və onun bədii rəhbəri - Filarmoniyanın direktoru Murad Adıgözəl-zadə, layihənin koordinatoru - Filarmoniyanın direktor müavini Ayla Kərimova-Zəkəriyyədir.

İnformasiya dəstəyi: Trend, Day.az, Milli.Az