“Gənclərə dəstək” layihəsinin iştirakçıları Fikrət Əmirovun 100 illik yubileyinə həsr olunmuş tədbirdə iştirak etdilər - VİDEO - FOTO

Azərbaycan Dövlət Akademik Filarmoniyasının "Gənclərə dəstək" layihəsinin iştirakçıları Azərbaycan Musiqi Mədəniyyəti Dövlət Muzeyində  Fikrət Əmirovun 100 illik yubileyinə həsr olunmuş tədbirdə iştirak etdilər.

Azərbaycan Musiqi Mədəniyyəti Dövlət Muzeyində görkəmli bəstəkar, SSRİ və Azərbaycan Respublikasının Xalq artisti, Sosialist Əməyi Qəhrəmanı, Dövlət Mükafatları laureatı Fikrət Əmirovun anadan olmasının 100 illiyinə həsr olunmuş tədbir keçirilmişdir.

Görkəmli bəstəkarın 100 illik yubileyinə həsr olunmuş tədbiri Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə  açmışdır.   

Azərbaycan Dövlət Film Fondu tərəfindən 2022-ci ildə yenidən bərpa olunmuş "Fikrət Əmirov" (1985) sənədli filminin təqdimatı keçirilmişdir.

Təqdimatdan əvvəl Azərbaycan Dövlət Film Fondunun direktoru, Əməkdar İncəsənət xadimi, Azərbaycan Dövlət Mədəniyyət və İncəsənət Universitetinin professoru Cəmil Quliyev, filmin rejissoru, Əməkdar incəsənət xadimi Cahangir Zeynallı, operatoru, Əməkdar incəsənət xadimi, Dövlət Mükafatı laureatı Rafiq Qəmbərov çıxış etmişdir. Filmə baxışdan sonra musiqişünas, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızı çıxış etdi.

Tədbir Respublika və Beynəlxalq müsabiqələr laureatları, Azərbaycan Dövlət Akademik Filarmoniyasının "Gənclərə dəstək" layihəsinin iştirakçıları Cəmalə Abdinzadə, Əzizə Ağazadə (f-no), Hüseyn Nağıyev (kamança), Prezident təqaüdçüsü Toğrul Abdullayev (violin), Surə Rüfət (violin), Nərgiz Cabbarova,  Fərid Atazadə (tar), Fərrux Haşımlı (kamança), Aygün Səfərzadə, Svetlana Əhmədova, Xədicə İsmixanova və başqaların ifalarında Fikrət Əmirovun əsərlərindən ibarət konsert proqramı ilə davam etmişdir.

Sonda görkəmli bəstəkarın qızı Sevil Əmirova ailəsi adından tədbirin təşkilatçılarına minnətdarlığını bildirdi.

Tədbirdə görkəmli bəstəkarın ailə üzvləri,  Bəstəkarlar İttifaqının sədri, Xalq artisti Firəngiz Əlizadə,  Azərbaycan Respublikasının Mədəniyyət Nazirliyinin İncəsənət və qeyri-maddi mədən irs şöbəsi, musiqi sektorunun müdiri Vüqar Hümbətov,  Muzey və Daşınar Mədəni İrs Sektorunun müdiri Altun Mikayıllı, musiqi ictimaiyyəti, Bakı muzeylərinin əməkdaşları və başqaları iştirak etmişlər.

İnformasiya dəstəyi - Trend.Az, Day.Az, Milli.Az