Bakıda "Range Rover"in sürücüsünü yaralayaraq qarət etdilər - YENİLƏNİB

10:54

"Range Rover"dən edilmiş oğurluq hadisəsinin təfərrüatları məlum olub. Nərimanov rayon Polis İdarəsinin 16-cı polis bölməsindən Milli.Az xəbər portalına verilən məlumata görə, "Range Rover"in sürücüsü 24 yaşlı Elvin Murquz oğlu Səfərli avtomobilində kiminsə olduğunu görərək maşına yaxınlaşıb. Bu zaman bir nəfərin maşında olan çantanı götürüb qaçmaq istədiyini görüb. Onun qarşısını kəsmək istəyərkən həmin şəxs bıçaqla E.Səfərliyə 3 zərbə vurub.

Polis əməkdaşları qısa zamanda həmin şəxsi həbs ediblər. Məlum olub ki, quldurluqda şübhəli bilinən şəxs 23 yaşlı Kəlbəcər sakini Xəyyam Əlizadədir.

Faktla bağlı Cinayət Məcəlləsinin quldurluq (181-ci) maddəsi ilə cinayət işi başlanıb.

----------
10:09

Rayon Polis İdarəsindən Milli.Az xəbər portalına verilən məlumata görə, Ataturk prospekti 42 ünvanında "Range Rover" markalı avtomobildən içərisində pul olan çanta və bahalı saat oğurlanıb. Oğurluq törədən şəxs qaçmaq istəyərkən Nərimanov rayon Polis İdarəsinin 16-cı polis bölməsinin əməkdaşları tərəfindən tutulub.

Hadisə ilə bağlı ətraflı məlumat veriləcək.

Anar Məmmədov
Milli.Az