Həmyerlimizin kafesində kütləvi davanı partlayış da dayandırmadı - VİDEO

Rusiyanın Volqoqrad bölgəsinin Volj şəhərində azərbaycanlıya məxsus "Kaspi" kafesində kütləvi dava qeydə alınıb.

Anspress-in məlumatına görə, 20 nəfərin iştirak etdiyi davada əl qumbarasının partlaması nəticəsində 10 nəfər müxtəlif dərəcəli xəsarət alıb. Partlayışı törədən 41 yaşlı kişi şübhəli kimi axtarılır.

Atışmanın da olduğu kütləvi davada kafe ziyarətçilərindən biri əl qumbarasını işə salıb. O qumbaranı dalaşanların ayağı altına atıb. Partlayış dalğasından yıxılmayanlar isə əvvəlcə davanı davam ediblər, daha sonra isə hadisə yerindən qaçıblar. Onların tutulması üçün şəhərdə "ələ keçirmə" planı elan olunub.

Plan nəticəsində çevik qüvvələr maşınla şəhərdən çıxmaq istəyən 5 Volqoqrad sakinini saxlayıblar. Onlardan 6 ədəd travmatik, pnevmatik silah və ov tüfəngi müsadirə edilib. Partlayışı törətməkdə şübhəli bilinən isə hələ də polis tərəfindən axtarışdadır.

İnsidentdən sonra tibbi kömək üçün 10 nəfər xəstəxanaya müraciət edib. Onlardan beşinə tibb işçilərinin köməyi lazım olmayıb. Lakin digər beşi müxtəlif zədələrlə xəstəxanada qalıb.

Onlardan biri, boynundan qəlpə zədələri ilə ağır yaralanan Yevgeni Pankov artıq əməliyyat olunub. Hazırda o reanimasiya şöbəsindədir. Eləcə də 33 yaşlı Maksim Paramokşin və 22 yaşlı Anton Artyomov baş və boyun nahiyəsindən çoxlu qəlpə yaraları diaqnozu ilə xəstəxanaya yerləşdirilib. 30 yaşlı İvan Prokofyevdə də beyin silkələnməsi və kürək yarası qeydə alınaraq xəstəxanada saxlanılıb. Xəstəxanada qalan yaralılardam biri isə erməni əsilli Karen Ovsayandır.

Davanın baş vermə səbəbi müəyyənləşdirilir. Hadisə ilə əlaqədar Rusiya Cinayət Məcəlləsinin 222-ci: "Qanunsuz silah və sursatın əldə olunması, ötürülməsi, satılması, saxlanma və daşınması" və 213-cü bəndin 2-ci hissəsi "mütəşəkkil qrup tərəfindən əvvəlcədən danışılmış xuliqanlıq" maddəsi ilə cinayət işi açılması məsələsinə baxılır.

Qeyd edək ki, "Kaspi" MMC-nin direktoru azərbaycan əsilli Səfərov Bəhram Hacivəli oğludur.



Milli.Az