İcra başçısı məhkəməyə ifadə verdi: "Hiss etməmişəm"

Lənkəran Şəhər Hakimiyyətinin başçısı Taleh Qaraşovu öldürməyi planlaşdırmaqda, terror aktlarına hazırlıq görməkdə və digər ağır cinayətlərdə ittiham olunan Bəhruz Əskərovun cinayət işi üzrə məhkəmə prosesi keçirilib.

Milli.Az xəbər verir ki, Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən prosesdə zərərçəkmiş T.Qaraşovun nümayəndəsi Taleh İbrahimovun iştirak etdiyi məlum olub.

Nümayəndə deyib ki, müvəkkilin təqsirləndirilən şəxsə qarşı heç bir maddi iddiası yoxdur, lakin ona qarşı şikayəti yerində qalır.

Daha sonra Taleh Qaraşovun ibtidai istintaq zamanı verdiyi ifadəsi elan olunub. O, ifadəsində göstərib ki, təqsirləndirilən Bəhruz Əskərovu tanımır, onunla heç bir ədavəti yoxdur. Onun sözlərinə görə, həyatına sui-qəsd hazırlığı ilə bağlı məlumatı mətbuatdan öyrənib: "Mənim heç kimlə düşmənçiliyim olmayıb. Məni kiminsə izləməsini, həyatıma təhlükənin olmasının, sui-qəsd etməsini hiss etməmişəm".

Daha sonra hakim Səbuhi Hüseynov deyib ki, zərərçəkmiş şəxsin ifadəsi tədqiq olunub. O, şahidlərin dindirilməsi mərhələsinin başlandığını açıqlayıb.

Hakim qeyd edib ki, iş üzrə üç şahid var, həmin şahidlərdən biri hazırda həbsdədir. Hakimin sözlərinə görə, şahidlərdən ikisi növbəti iclasda dindirilməsi təmin olunacaq, həbsdə olan digər şahidin isə dindirilməsi məsələsi növbəti iclasda müzakirə ediləcək.

Hakim həmin iki şahidin məhkəməyə çağırılması üçün iclasın təxirə salındığını açıqlayıb.

Məhkəmənin növbəti iclası aprelin 29-na təyin olunub.

Qeyd edək ki, Bəhruz Əskərov respublikanın müxtəlif rayonlarında yaşayan şəxsləri gizli əlaqəyə cəlb edərək onlara Lənkəranın icra başçısının həyatına sui-qəsdin təşkil olunması barədə tapşırıqlar verib.

Həmçinin Bəhruz Əskərovun əlaqəsində olan şəxslərə Azərbaycanın bəzi rayonlarında fərdi qaydada ingilis dili müəllimi kimi fəaliyyət göstərən xarici ölkə vətəndaşına qarşı sui-qəsd həyata keçirməyi tapşırması da təsbit edilib.

Lakin o, Dövlət Təhlükəsizliyi Xidməti tərəfindən görülən tədbirlər nəticəsində cinayət əməllərini yekunlaşdıra bilməyib.

Dövlət Təhlükəsizliyi Xidməti tərəfindən cinayət məsuliyyətinə cəlb olunan Bəhruz Əskərova qarşı Cinayət Məcəlləsinin 28,120.2.1, 28,120.2.10, 28,120.2.11, 28,120.2.12 (qabaqcadan əlbir olan bir qrup şəxs halında milli, irqi, dini ədavət və düşmənçilik zəminində təkrar adam öldürməyə hazırlıq), 28,214.2.1, 28,214.2.3 (odlu silahdan və silah qismində istifadə olunan predmetlərdən istifadə etməklə terror aktı törətməyə hazırlıq), 28,214-3.1 (terrorçuluqla əlaqədar təlim keçməyə hazırlıq), 28,277 (dövlət xadiminin həyatına sui qəsd etməyə hazırlıq) və 28,278.1-ci (dövlətin konstitusiya quruluşunun zorla dəyişdirilməsinə yönələn hazırlıq hərəkətləri) maddələri ilə ittiham irəli sürülüb.

İş üzrə Lənkəran Şəhər İcra Hakimiyyətinin başçısı və xarici ölkə vətəndaşı zərərçəkmiş qismində tanınıb. /Teleqraf

Milli.Az