Bakıda namaz qılan qadını öldürüb, Gürcüstana qaçdı - təfərrüat - YENİLƏNİB

21:59

48 yaşlı Lamiyə Məmmədova namaz qıldığı yerdə qətlə yetirilib. Hadisə Xəzər rayonu, Binə qəsəbəsində baş verib.

Ehtimal olunur ki, qadın həyat yoldaşı Ramil Məmmədov tərəfindən qətlə yetirilib.

Onun dəmir əşya ilə başından bir neçə dəfə vurulduğu, daha sonra barmaqlarının sındırıldığı deyilir.

"Gecə saat 00-a qalmışdı, bir də eşitdim ki, çığır-bağır səsləri gəlir. Polis gəlmişdi. Nə baş verdiyini soruşanda, dedilər ki, kişi həyat yoldaşını dəmirlə vurub, sonra da qaçıb gedib. Yeniyetmə oğulları var. Anasının meyitini görüb, şokda idi", - deyə mərhumun qonşusu bildirib.

Qeyd edək ki, Daxili İşlər Nazirliyindən (DİN) verilən məlumata görə, cinayət əməlini törətməkdə şübhəli bilinən qadının həyat yoldaşı, 1979-cu il təvəllüdlü Ramil Məmmədov Gürcüstan Respublikasında saxlanılıb. Onun Azərbaycana ekstradisiyası üçün tədbirlər görülür.

Faktla bağlı cinayət işi başlanıb. (baku.tv)

-----------
09:28

Fevralın 8-də saat 23 radələrində Xəzər rayonu Binə qəsəbəsində evlərin birində 1976-cı il təvəllüdlü Lamiyə Məmmədovanın küt alətlə qətlə yetirilməsi barədə polisə məlumat daxil olub.

DİN-in Mətbuat Xidmətindən Milli.Az-a verilən məlumata görə, cinayət əməlini törətməkdə şübhəli bilinən qadının həyat yoldaşı, 1979-cu il təvəllüdlü Məmmədov Ramil Məhərrəm oğlu Gürcüstan Respublikasında saxlanılıb.

Onun ölkəyə ekstradisiyası üçün tədbirlər görülür.

-------

07:59

Fevralın 8-də Bakının Xəzər rayonu, Binə qəsəbəsi ərazisində ailə münasibətləri zəminində dəhşətli qətl hadisəsi baş verib.

Milli.Az məlumat verir ki, Binə qəsəbəsi 138-ci döngə, 62 ünvanında yaşayan 48 yaşlı Lamiyə Məmmədova qətlə yetirilib. Bildirilir ki, qadın namaz qıldığı yerdə öldürülüb.

Hadisəni qadının həyat yoldaşı, 46 yaşlı Ramil Məmmədovun törətdiyi deyilir.

Qeyd olunur ki, o, dəmir əşya ilə qadının başından bir neçə dəfə vurub. Daha sonra barmaqlarını sındırıb. Bundan sonra qadını boğub. Meyitin belində də barmaq izlərinin olduğu müəyyənləşib.

Hadisədən sonra Ramil Məmmədov qaçıb. Hazırda qətldə şübhəli bilinən şəxsin axtarışları davam edir.

Hüquq mühafizə orqanlarından hadisəni təsdiqləyiblər və qaçan şəxsin hələlik tapılmadığı bildirilib.

Faktla bağlı cinayət işi başlanıb, araşdırma aparılır.

Milli.Az