Ölkə

"Azərbaycanın filiz yataqları atlası" hazırlanıb

14 Mart 2018 13:18
0 Şərh     Baxış: 854

"Elm" nəşriyyatında çap olunmuş "Azərbaycanın filiz yataqları atlası" AMEA Geologiya və Geofizika İnstitutu alimlərinin 6 illik zəhmətinin bəhrəsidir.

AMEA Geologiya və Geofizika İnstitutunun İctimaiyyətlə əlaqələr və elmin  populyarlaşdırılması şöbəsindən Milli.Az-a verilən məlumata görə, atlas Azərbaycan alimlərinin  çoxillik tədqiqatları əsasında hazırlanıb. Filiz yataqları sahəsində tədqiqatçı alimlərin və təşkilatların  apardıqları elmi nəticələr də yeni nəşdə əksini tapıb. Baş redaktoru AMEA-nın prezidenti akademik Akif Əlizadə olan nəşri  A.İsmayılzadə,D.Hüseynov, D.Azadəliyev, S.Vəlizadə, Z.Vəliyev, Ş.Babayev və Q.Babayevdən ibarət alimlər qrupu tərtib edib.

Atlasda bir neçə Azərbaycan geoloq nəsli tərəfindən ölkənin filiz yataqları barədə sənaye-genetik tiplər üzrə zəngin material toplanıb.  192 səhifəlik atlasda  469 makro və mikro fotoqrafiya, xəritə, sxem, geoloji diaqram, 42 cədvəl yer alıb. "Qara metallar", "Aşqarlar", "Əlvan metallar","Yüngül metallar","  Nəcib  metallar" başlıqlı fəsillərdə filiz yataqlarının məkanı xarakterizə olunur. Burada Daşkəsən, Şəmkir, Göygöl, Ağdərə, Çənlibel, Laçın, Əylis, Darıdağ, Qızılbulaq, Başkəndçay, Şəkərdərə, Ağyurd və s. kimi 110 filiz yatağının hərtərəfli geoloji, struktur-morfoloji, mineraloji, geokimyəvi və digər xüsusiyyətlər əksini tapıb.

"Azərbaycanın filiz yataqları atlası" işıq üzü görən kimi yerli və xarici mütəxəssislərin   diqqətini cəlb edib.   Rusiya Elmlər Akademiyası (REA) Filiz Yataqlarının Geologiyası,  Petroqrafiya , Mineralogiya və Geokimya İnstitutunun elmi rəhbəri, akademik N.S.Bortnikov  atlasın yüksək dəyərləndirib. Rusiyalı alim bildirib ki, bu atlas Azərbaycanda  yeraltı  sərvətlərdən səmərəli istifadə layihələrində, filiz yataqlarına investisya qoyuluşunda dövlət fondunun  və potensial sərmayəçilərin diqqətini şübhəsiz ki, cəlb edəcək.

ADU-nun gelogiya fakültəsi faydalı qazıntılar kafedrasının müdiri, akademik Vasif Babzadə yeni nəşri fundamental və çox aktual elmi iş kimi dəyərləndirib.  Hər iki alimin rəyinə görə, bu nəşr mühüm elmi və praktik əhəmiyyət daşımaqla yanaşı, filiz yataqlarını öyrənən  mürtəxəssislər, tələbələr, magistrlər və doktorantlar üçün də çox faydalı mənbədir.

AMEA Geologiya və Geofizika İnstitutu direktorunun elmi işlər üzrə müavini Dadaş Hüseynovun verdiyi məlumata görə, "Azərbaycanın filiz yataqlarının atlası" bu elm ocağının 80 illiyi yubileyi münasibətilə hazırlanıb və yaxın gələcəkdə yeni nəşr Azərbaycan və ingilis dillərində də çap olunacaq.

Zərif Nisə
Milli.Az

loading...

Şərh yaz:

0 Şərh:

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.