Ölkə

Air Astana Qazaxıstan və Bakı arasında qış reyslərinə aviabiletlərin satışını açıb

16 Sentyabr 2026 10:00

Baxış: 302

VTB-də minimal faiz dərəcəsi ilə nağd kredit 9.9%-dən

Air Astana 2026/2027-ci illərin qış uçuş cədvəli çərçivəsində Bakıdan Almatı və Atırau istiqamətlərinə aviabiletlərin satışını açıb. Uçuşlar Airbus A320 və Airbus A321LR tipli təyyarələrlə həyata keçiriləcək.

Qış mövsümündə Almatı - Bakı - Almatı marşrutu üzrə uçuşlar həftədə iki dəfə - cümə axşamı və bazar günləri həyata keçiriləcək. Bakı - Almatı istiqamətində aviabiletin qiyməti 320 manatdan başlayır. Atırau - Bakı - Atırau marşrutu üzrə uçuşlar həftədə üç dəfə - bazar ertəsi, çərşənbə və bazar günləri yerinə yetiriləcək. Bakı - Atırau istiqamətində aviabiletin qiyməti 228 manatdan başlayır.

Hazırda yay uçuş cədvəli çərçivəsində Air Astana Almatı və Bakı arasında həftədə dörd, Atırau və Bakı arasında isə həftədə beş reys həyata keçirir.

Birbaşa reyslərlə yanaşı, Azərbaycandan olan sərnişinlər Almatıda rahat bağlantılardan istifadə edərək aviaşirkətin Mərkəzi və Cənub-Şərqi Asiyadakı digər istiqamətlərinə səyahətlərini davam etdirə bilərlər. Bu istiqamətlər arasında Tailandda Phuket və Banqkok, Vyetnamda Phu Quoc, Cənubi Koreyada Seul, həmçinin Çində Pekin, Urumçi, Quançjou və Şanxay yer alır.

Tranzit sərnişinlər Air Astana-nın MySTOPOVER proqramından da yararlana bilərlər. Proqram çərçivəsində sərnişinlər səyahətləri zamanı Almatı və ya Astanada dayanacaq edə bilərlər. Paketlərin qiyməti 30 ABŞ dollarından başlayır. Paket gəlişdən ən azı 96 saat əvvəl rəsmiləşdirilməlidir.

Qış mövsümü üçün aviabiletlərin satışı artıq airastana.com saytında, Air Astana mobil tətbiqində, aviaşirkətin satış ofislərində və turizm agentliklərində açıqdır.

Air Astana - Qazaxıstanı Mərkəzi Asiya, Qafqaz, Uzaq Şərq, Yaxın Şərq, Hindistan və Avropa ölkələri ilə birləşdirən daxili, regional və beynəlxalq sərnişin və yük daşımalarını həyata keçirən aviaşirkətlər qrupudur.