Azərbaycanda yayılan virusla bağlı vacib AÇIQLAMA: "Martın ortalarından..."

Son vaxtlar viral infeksiyaya yoluxmada kəskin artım müşahidə olunur.

Bununla bağlı Sfera.az-a açıqlama verən professor, tibb elmləri doktoru Musa Qəniyev deyib ki, dekabr ayından başlayaraq öskürək, yüksək temperatur, "kataral vəziyyət", səsin tutulması, halsızlıq, bütün bədəni bürüyən ağrı ilə müşahidə olunan virus mövcuddur:

"Hazırda kəskin bronxit və pnevmoniya kimi ağırlaşmaların da artdığı sirr deyil. Vətəndaşları ən çox narahat edən isə son günlər Çində eyni klinik simptomlar göstərən yeni bir virusun -  metapnevmovirusun epidemik xarakterli artımı və bunun ölkəmiz də daxil, dünyaya yayılaraq yeni bir pandemiyaya səbəb olma qorxusudur. Digər xüsusi narahatlığa səbəb olan hal, dekabrın sonunda Tayvandda "Money UDN" nəşrində bu virusunun letallıq əmsalının 43%-ə yaxın olması haqqında qeyd edilən iddialardır. Rəsmi mənbələrdə ölkəmizdə bu virusa yoluxmanın qeydə alınmadığı bildirilir. Əvvəla unutmamalıyıq ki, biz sərhədlərin şəffaflaşdığı, qloballaşan bir dünyada yaşayırıq. Odur ki, "dünən" dünyanın istənilən bir nöqtəsində hər hansı bir viral infeksiyaya yoluxma halı baş veribsə, "sabah" onun ölkəmizə və ya dünyanın istənilən bir ölkəsinə daşına biləcəyi tamamilə reallıqdır. Bu səbəbdən də, bu və ya digər infeksiya qonşu ölkələrdə var. "Hələ bizim ölkəmizdə yoxdur və ya olmayacaq" fikri tamamilə absurddur".

Professor metapnevmovirusun yeni olmadığını vurğulayıb:

"Bu, hazırda tənəffüs yolu infeksiyası törədə bilən və ümumi sayı 200-dən artıq olan virus ailəsi üzvlərindən biridir, düz 65 ildir ki, bizimlə yol yoldaşıdır. Cinsindən və irqindən asılı omayaraq, insanlar arasında bu virusa yoluxma daima baş verib və verir. Yoluxmada fəsli sıçrayışlara gəldikdə isə bu təbii və qanunauyğun bir haldır. Virusun genom quruluşunda istər nöqtə, istərsə də xromosom parçalarının ayrılması kimi daha ciddi mutasiyalar müşahidə edilməyib. Bildirilir ki, bu virus, xüsusən uşaqlar və yaşlı şəxslər üçün qorxuludur. Qeyd etməliyəm ki, bütün yaş qrupunda olan insanlar bu virusa həssasdır, yoluxa bilər və yoluxur. Yəni burada faciə kimi təqdim ediləcək qeyri-adi bir şey yoxdur".

M.Qəniyev qeyd etdi ki, hazırkı virus infeksiyası ekliptik hərəkət boyunca ardıcıl növbələşən üç dalğa şəklində davam etməlidir:

"Hazırkı birinci dalğa, yanvar ayının ikinci yarısına kimi saxlanılacaq, daha sonra fevral ayının birinci ongünlüyünə qədər ikinci dalğa olacaq - yoluxmada stabilləşmə müşahidə ediləcək, ikinci ongünlüyündən etibarən isə üçüncü dağlanı görəcəyik - kəskin zəifləmə olacaq. Nəhayət, mart ayının 2-ci ongünlüyündən etibarən sporodikləşmə və sönmə baş verəcək. Xəstələnmə zamanı fəsadlaşma və ya ikincili mikrob infeksiyası baş vermədiyi halda antibiotik, antibakterial dərman maddələri, eləcə də insanlarımızın çox sevdiyi "sistem vurdurmaq" mütləq əks göstərişdir. Yoluxmanın ilkin və davam etdiyi müddətdə müalicə prinsipi, bütün hallarda inteqrativ təbabətin tövsiyə etdiyi meyarlar (dəstəkləyici və sanogenetik terapiya) üzrə aparılmalıdır. Xəstə olmayan şəxsin maska taxması da məsləhət deyil".

Milli.Az