Anasının atıb getdiyi 13 yaşlı Sarayın meyiti tapıldı - Yenilənib

22:08

2024-cü il dekabrın 24-də Zərdab rayonunda Kür çayında batan 13 yaşlı yeniyetmə qızın meyiti yanvarın 2-də tapılıb. Meyit batdığı yerdən təxminən 15 kilometr aralıda, Kür çayının Kürdəmir rayonunun Söyüdlü kəndi ərazisindən keçən hissəsində aşkarlanıb.

Fövqəladə Hallar Nazirliyinin Aran Regional Dalğıc-axtarış qrupunun əməkdaşları meyiti sudan çıxararaq aidiyyəti üzrə təhvil veriblər.

Mərhumun nənəsi Aişə Kərimova hadisə ilə bağlı danışaraq bildirib:

"Uşağı səhər dərsə yola salmışdım. Qardaşı ilə birlikdə evdən çıxmışdılar. Yolda məktəbdə işləyən xadimə ona "Gəl, birlikdə gedək" desə də, Saray "Sən get, mənim işim var, adam gözləyirəm" deyib. Sonra gözlədiyi qıza "İlkin müəllimə deyərsən ki, Saray Kürə getdi" söyləyib. Bilmirəm ki, aralarında nə baş verib. Dekabrın 4-də də ad günü idi. Anası zəng etmişdi. Nə qədər desək də, onunla danışmaq istəmədi. Anası üç il əvvəl uşaqlarını qoyub başqasına ərə gedib".

Hadisə ilə bağlı araşdırma aparılır. (bakutv)

---------
14:37

24 dekabr 2024-cü il tarixində Kür çayının Zərdab rayonu, Əlvənd kəndindən keçən hissəsində batan vətəndaş - 2011-ci il təvəllüdlü Kərimli Saray Sərvan qızının meyiti Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıcları tərəfindən suda tapılıb çıxarılaraq aidiyyəti üzrə təhvil verilib.

Bu barədə Milli.Az-a FHN-nin Mətbuat xidmətindən məlumat verilib.

XXX

Kür çayında batan 8 -ci sinif şagirdinin meyiti batdığı yerdən 15,16 km aralıda sudan çıxarılaraq aidiyyəti üzrə təhvil verilib.

Milli.Az xəbər verir ki, hadisə dekabrın 24-də Kür çayının rayonun Əlvənd kəndi ərazisindən keçən hissəsində qeydə alınıb.

8-ci sinif şagirdi səhər saatlarında məktəbə getmək adı ilə evdən çıxıb. Əmisi Zamin Kərimovun dediyinə görə, müəllimləri onun məktəbə gəlmədiyini bildikdən sonra axtarışına başlayıblar. Azyaşlının çantası Kür çayının kənarında tapılıb. Onun çayda batdığı ehtimal olunduğundan hadisə yerinə Fövqəladə Hallar Nazirliyinin (FHN) Aran Regional dalğıc-axtarış qrupunun əməkdaşları cəlb olunub./APA

Milli.Az