Seçki prosesi olduqca şəffaf və açıq keçdi - İƏT PA

Azərbaycanda növbədənkənar parlament seçkilərində proses olduqca şəffaf və açıq keçdi.

Milli.Az Trend-ə istinadən xəbər verir ki, bunu sentyabrın 1-də keçirilən növbədənkənar parlament seçkilərinin yekunları ilə bağlı təşkil olunan mətbuat konfransında İqtisadi Əməkdaşlıq Təşkilatının Parlament Assambleyasının (İƏT PA) nümayəndəsi, Pakistan Milli Assambleyasının üzvü Malik Saif ul Maluk Xoxar deyib.

"Biz parlament seçkilərini müşahidə etmək üçün Azərbaycana gəlmişik. Qardaş dövlətdə keçirilən parlament seçkilərini müşahidə etdiyimiz zaman bizə göstərilən qonaqpərvərliyə görə təşəkkür edirik. Hazırda Pakistan Milli Assambleyası İƏT PA-ya sədrlik edir. Bu yaxınlarda bizim təşkilatın nizamnaməsi ratifikasiya olundu və biz ölkələrimizin və xalqlarımızın rifahı istiqamətində çalışacağıq. Seçkilər prosesi olduqca şəffaf və açıq keçdi", - deyə o bildirib.

Onun sözlərinə görə, səsvermə prosesi zamanı demokratik dəyərlərə sadiqlik nümayiş etdirildi.

"Vətəndaşlar yüksək fəallıq nümayiş etdirdi. Bir daha Azərbaycan xalqını bu uğurlu seçkilər münqsibətilə təbrik edirəm. Biz əmənik ki, İƏT çərçivəsində əməkdaşlığımızı davam etdirəcəyik", - deyə o əlavə edib.

Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. İlkin nəticələrə görə, seçkilərdə seçici fəallığı 37,27 faiz təşkil edib. Seçkilərdə səs verən seçicilərin sayı 2 196 771 nəfər olub. 5895 seçki məntəqəsi protokollarını MSK-ya təqdim edib.

Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.

Milli.Az
Xəbərlərimizi WhatsApp kanalımızdan da oxuyun