“Xəstə uşaqların pullarını yeyiblər, indi artistlik edirlər”

Talassemiyadan əziyyət çəkən uşaqlar üçün toplanmış vəsaitləri ələ keçirməkdə ittiham olunan "Urmedhelp" və "My Doc Tour" adlı şirkətlərin sahibi Nuridə Seyidova və digər iki nəfər - Aynur Bayramova və Aysel Məmmədovanın cinayət işi üzrə məhkəmə prosesi keçirilib.

Milli.Az qafqazinfo-ya istinadən xəbər verir ki, Bakı Ağır Cinayətlər Məhkəməsində keçirilən iclasa təqsirləndirilən Nuridə Seyidovanın vəkili gəlməyib.

Sədrlik edən hakim Azad Məcidov deyib ki, vəkil Lətifə Kərimova artıq ikinci dəfədir, məhkəməyə gəlmir. Bu səbəbdən Vəkillər Kollegiyasına müraciət ediləcək. Belə ki, N.Seyidova bir müddət əvvəl dövlət hesabına vəkillə təmin olunmasına baxmayaraq, müdafiəçidən imtina edib, Lətifə Kərimova ilə müqavilə bağlayıb. Lakin həmin vəkil iclaslarda iştirak etmir.

"Biz məhkəmə istintaqını başlaya bilmirik. Vəkil hər dəfə məhkəmə iclasını qəsdən pozur. Get özünə başqa vəkil tut", - hakim müttəhim Seyidovaya deyib.

Prosesdən sonra zərərçəkmişlə təqsirləndirilən şəxslərdən birinin yaxını arasında mübahisə yaranıb.

Təqsirləndirilən şəxsin yaxını zərərçəkmişə şikayət etdiyi üçün qarğış edib.

"Xəstə uşaqların pullarını yeyiblər, indi artistlik edirlər", - deyə talassemiyalı uşağın atası cavab verib.

Məhkəmə prosesi aprelin 17-si davam edəcək.

Qeyd edək ki, talassemiyalı xəstələrin valideynlərinin Daxili İşlər Nazirliyinə müraciətindən sonra ötən ilin fevralında cinayət işi başlanılıb. Müəyyən edilib ki, Nuridə Seyidova digərləri ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib.

Təqsirləndirilən şəxslərdən Nuridə Seyidova həbsdədir. Digərləri haqda həbsə alternativ qətimkan tədbiri seçilib.

***

Vəkil Lətifə Kərimova mövzu ilə bağlı bildirib ki, bu gün saat 11-də Bakı Apellyasiya Məhkəməsində mülki işlə bağlı prosesdə iştirak edib: "Sözügedən məhkəmə prosesi gec başladığından (hakim başqa iclas aparırdı) Bakı Ağır Cinayətlər Məhkəməsindəki digər iclasda iştirak edə bilməmişəm. Saat 11-də baxılmalı proses 11:40-da başladı və mən də çatdırıb digər məhkəmə binasına gedə bilmədim. Bununla bağlı elektron sistemdə müvafiq ərizəmi də yerləşdirmişəm".

Milli.Az
Xəbərlərimizi WhatsApp kanalımızdan da oxuyun