Etirazçılar şərəfli missiyalarını 100 gündür davam etdirirlər

Bu gün Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən etiraz aksiyasının 100-cü günüdür.

Milli.Az xəbər verir ki, ötən ilin dekabrın 12-də başlayan aksiya fasiləsiz olaraq davam edir.

Bu müddət ərzində ekofəallar yolun hər iki tərəfində hərəkətə heç bir maneə törətmədən sivil şəkildə öz tələblərini irəli sürür və dünya ictimaiyyətinə çağırışlar edirlər.

Gün ərzində yoldan Rusiya sülhməramlılarına və ya Beynəlxalq Qızıl Xaç Komitəsinə (BQXK) məxsus onlarla avtomobil keçid edir və dinc aksiyanın iştirakçıları həmin avtomobillərin maneəsiz hərəkətinə tam şərait yaradırlar.

Ekofəallar bununla da dünya ictimaiyyətinə çatdırırlar ki, yol, aksiyanın keçirilməsinə baxmayaraq, humanitar məqsədlər üçün açıqdır və yolun guya bağlandığını iddia edən erməni mətbuatının yaydığı informasiyalar saxta və əsassızdır.

Heç şübhəsiz ki, erməni mətbuatında yer alan bu saxta məlumatlar Azərbaycanın əleyhinə hesablanmış növbəti avantüradır.

Onların bu çirkin kampaniyalarına baxmayaraq, Xankəndi-Laçın yolunda sərbəst hərəkət edən hər bir nəqliyyat vasitəsinin maneəsiz keçidi yolun humanitar məqsədlər üçün açıq olmasına sübutdur.

100 gündür yüksək əhval-ruhiyyə ilə dinc aksiya keçirən ekofəallar müxtəlif şüarlar vasitəsilə etirazlarını bildirirlər. Dinc aksiyanın iştirakçıları bu müddət ərzində bəzi vaxtlarda havanın qarlı, şaxtalı və soyuq olmasına baxmayaraq, öz şərəfli missiyalarını davam etdiriblər və bu missiyanı bu gün də davam etdirməkdədirlər.

Onlar üzərində Azərbaycan, rus və ingilis dillərində yazılmış plakatlar qaldırır və şüarlar səsləndirərək ilk gündən olduğu kimi dəyişməz tələblərini irəli sürürlər.

Aksiya iştirakçıları tələbləri yerinə yetirilənə qədər etirazlarını davam etdirəcəklərini bildirirlər.

Beləliklə, etirazçılar dünya ictimaiyyətini ekologiyanı qorumağa çağırırlar.

Ekofəallar və gənc könüllülər "Azərbaycan oyaqdır, sərvətinə dayaqdır!", "Azərbaycan vahiddir, sərvətinə sahibdir!", "Ekoloji cinayətə son!", "Stop ekoterror!", "Берегите природу!", "Экоциду нет! Мониторингу да!" şüarlarını səsləndirirlər.

Qeyd edək ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı fəallar və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.

2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və "AzerGold" Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.

Milli.Az