Gültəkin Hacıbəyli bu xanımın şikayəti əsasında saxlanılıbmış - YENİLƏNİB

11:24

Sabiq deputat, Milli Şuranın üzvü Gültəkin Hacıbəyli barəsində həbsli axtarışla bağlı qərar ləğv olunub.

Milli.Az xəbər verir ki, bu barədə APA-ya Gültəkin Hacıbəylinin vəkili Bəhruz Bayramov məlumat verib.

O bildirib ki, Gültəkin Hacıbəyli Nəsimi Rayon Məhkəməsinə gətirilib və sərbəst buraxılıb:

"Ondan xüsusi ittiham qaydasında şikayət edən Leyla Arif adlı şəxsdir. Leyla Arif sosial şəbəkə hesabında Gültəkin Hacıbəylinin ona böhtan atdığını bildirib və barəsində şikayət verib".

Gültəkin Hacıbəyli ölkədə olmadığına görə onun barəsində həbsli axtarış elan olunub. Hazırda dayandırılmış icraat yenilənib və hakim Elməddin Hüseynovun icraatında olan iş üzrə məhkəmə prosesi dekabrın 8-nə təyin edilib.

----------

10:09

Sabiq millət vəkili Gültəkin Hacıbəyli hava limanında saxlanılıb.

Bu barədə Trend-ə vəkil Bəhruz Bayramov məlumat verib.

O bildirib ki, G.Hacıbəyli xarici ölkədən Azərbaycana qayıdarkən hava limanında saxlanılıb.

Sabiq millət vəkilinə qarşı Cinayət Məcəlləsinin 147.2-ci maddəsi ilə ittiham irəli sürülüb.

B.Bayramov bildirib ki, G.Hacıbəyli barəsində həmin maddə ilə axtarış elan olunsa da, G.Hacıbəyli bu məsələdən məlumatsız olduğunu deyib.

"Cinayət işi üzrə Nəsimi rayon Məhkəməsində proses keçirilib. Məhkəmə G.Hacıbəyli barəsində axtarış qərarını ləğv edib, sabiq millət vəkili sərbəst buraxılıb. Amma barəsində xüsusi ittiham qaydasında cinayət işi davam etdirilir. Növbəti proses dekabrın 8-nə təyin edilib", - deyə o əlavə edib

-----------

09:41

Sabiq deputat, Milli Şuranın üzvü Gültəkin Hacıbəyli saxlanılıb.

Milli.Az "Qafqazinfo"ya istinadən xəbər verir ki, o, xaricdən ölkəyə qayıdarkən Bakıda hava limanında tutulub.

İlkin məlumata görə, ona bildirilib ki, barəsində cinayət işi başlanıb. Belə ki, ötən ay G.Hacıbəylidən Cinayət Məcəlləsinin 147.2 (Ağır və ya xüsusilə ağır cinayətdə ittiham etməklə böhtan atma) maddəsi ilə şikayət olunub. Onun barəsində xüsusi ittiham qaydasında cinayət işi açılıb.

Məlum olub ki, G.Hacıbəyli Nəsimi Rayon Məhkəməsi tərəfindən axtarışa verilibmiş. Hazırda G.Hacıbəylinin Nəsimi Rayon Polis idarəsində olduğu, məhkəməyə təqdim olunacağı bildirilir.

Milli.Az