Çindən avtomobil ixracı çətinləşdi - Yeni QAYDA

14 noyabr tarixində Çinin bir neçə nazirliyi paralel avtomobil ixracı ilə bağlı qaydaları sərtləşdirən birgə bildiriş yayıb. 

Milli.az məsələni təhlil edərək dəyişikliklərin nə dərəcədə ciddi olacağını araşdırıb.

Son vaxtlar bir çox Çin avtomobil istehsalçıları daxili bazar üçün nəzərdə tutulan, lakin "sıfır yürüşlü ikinci əl" kimi xaricə çıxarılan avtomobillərin artan ixrac kanallarından narahatlıqlarını bildirirdilər. Söhbət belə bir sxemdən gedir: bəzi şirkətlər yeni avtomobilləri alır, onları Çində qeydiyyata salır, dərhal da qeydiyyatı ləğv edərək avtomobili ölkə xaricinə göndərirlər.

Yeni qaydalara əsasən, qeydiyyata alındıqdan sonra 6 aydan az müddət keçmiş istifadə olunmuş avtomobillərin ixracı üçün şirkətlər gömrük orqanlarına xüsusi sənəd təqdim etməlidirlər. Bu sənəd "Satışdan sonrakı xidmət üzrə təsdiq" adlanır. Əslində bu, avtomobil istehsalçısının rəsmi möhürü ilə təsdiqlənmiş məktubdur. Burada ixrac olunan ölkə, avtomobilin məlumatları və həmin ölkədə avtomobilin servis xidməti göstərilə biləcək məntəqələrin siyahısı qeyd olunmalıdır.

Qaydaların digər hissəsi avtomobillərin texniki xüsusiyyətləri və sertifikatları barədə məlumatların daha ciddi şəkildə toplanmasına və yoxlanmasına aiddir. Əsas dəyişiklik isə 6 aydan az qeydiyyatda olan istənilən ikinci əl modelin ixracı üçün artıq istehsalçının faktiki icazəsinin tələb olunmasıdır.

Bu qərarın yayımlanması ilə paralel idxal kanalları ilə işləyən şirkətlər arasında dərhal reaksiyalar formalaşıb: "Almaq lazımdır - indi!" Çünki bundan sonra proses uzanacaq: avtomobil 180 gün gözləməli olacaq ki, istehsalçı təsdiqi olmadan sadələşdirilmiş qaydada ixrac edilə bilsin. Bu isə həm vaxtı, həm də qiymətləri artıracaq. Biznes nümayəndələri artıq indidən belə modellərin bahalaşacağını gözləyirlər.

Bununla belə, dəyişikliklər bütün markalara eyni dərəcədə təsir etməyəcək. Çünki bəzi Çin şirkətləri əvvəldən "sıfır yürüşlü ikinci əl" avtomobillərin xaricə çıxmasını dolayı şəkildə dəstəkləyirdi. Bu, onların investorlar qarşısında daha yüksək satış göstəriciləri təqdim etməsinə və müəyyən maliyyə yükündən yayınmasına imkan verirdi.

Bundan əlavə, Çində bəzi ixrac şirkətlərinin sahibləri avtomobil istehsalçıları ilə birbaşa əlaqəli və yüksək vəzifələrdə olduqları üçün 6 aydan az olan avtomobillərin ixrac sənədlərini öz möhürləri ilə təsdiqləyə biləcəklər. Bu da həmin şirkətlərin bazarda mövqelərini daha da gücləndirəcək və rəqabətin azalması fonunda qiymətlərin real olaraq artmasına səbəb ola bilər.

Əsas təsir isə rəsmi ixrac kanallarına arxalanan böyük brendlərə dəyəcək. Buna ən bariz nümunələr kimi Chery, Changan və Geely göstərilir. Onlar əvvəllər də paralel ixracı məhdudlaşdırmağa çalışmışdılar. Lakin daha kiçik istehsalçılar üçün ikinci əl ixracı bəzən fəaliyyətlərini davam etdirməyin yeganə yoludur. Buna görə də onların mövcud ixrac kanallarını qoruyacağı gözlənilir.

Milli.Az