Tarixin ən bahalı AVTOMOBİLİ: 3 təyyarə qiymətinə - FOTOlar

Bəzi avtomobil istehsalçıları ultra dəbdəbəli modellər təqdim etsələr də, elə avtomobillər var ki, onları yalnız dünyanın ən zəngin şəxsləri əldə edə bilir.

Milli.Az xəbər verir ki, "Express" tarixin ən bahalı avtomobili barədə maraqlı məlumat yayıb. Bildirilib ki, bu nəqliyyat vasitəsinin qiyməti şəxsi təyyarədən üç, super yaxtadan isə iki dəfə baha olub.

Məlumata görə, hərrac tarixində rekord qiymətə satılan avtomobil 1955-ci ildə istehsal olunmuş "Mercedes-Benz 300 SLR Uhlenhaut Coupe"-dir. Mercedes-Benz yarış bölməsi tərəfindən cəmi iki prototip hazırlanıb və onlardan biri 2022-ci ildə 135 milyon avroya (təxminən 158 milyon dollar) hərracda satılıb.

Bununla yanaşı, indiyə qədər istehsal edilən ən bahalı avtomobil isə "Rolls-Royce La Rose Noire Droptail" hesab olunur. Bu model xüsusi sifariş əsasında hazırlanıb və cəmi dörd ədəd istehsal olunub. Onların arasında La Rose Noire ən bahalı versiya kimi seçilib.

"True Love" adı ilə tanınan bu avtomobil özünəməxsus rəng çalarları ilə diqqət çəkir. Korpus işıqlandırmadan asılı olaraq rəngini dəyişir. Bu effekti əldə etmək üçün Rolls-Royce mühəndisləri 150-dən artıq sınaqdan keçiriblər.

Modelin dizaynında həm "1912 Silver Ghost", həm də "1930 Phantom Brewster New York Roaster" klassiklərindən, eləcə də dəbdəbəli yaxtalardan ilham alındığı qeyd olunub.

Dünyanın ən bahalı avtomobilləri və ən güclü modelləri açıqlanıb.

Rolls-Royce-un eksklüziv modeli **La Rose Noire Droptail** interyerində unikal parket mozaikası ilə seçilir. Dizaynda yer alan qızılgül ləçəkləri 1603 ədəd qara çinar şponundan hazırlanıb və əl işidir. Təkcə bu detalın yaradılması iki ilə yaxın vaxt aparıb.

Avtomobilin ön panelində isə xüsusi hazırlanmış **Audemars Piguet Royal Oak Concept Split-Seconds Chronograph GMT Large Date** saatı yerləşdirilib. Saat avtomobilin rəng sxeminə uyğun dizayn olunub və istənildikdə çıxarılaraq biləkdə taxıla bilir.

Modelin digər özəlliklərindən biri karbon lifindən hazırlanmış çıxarıla bilən dam və "Mystery Red" ilə "True Love Red" çalarlarında dəri oturacaqlardır. Avtomobil 6,75 litrlik V12 turbomühərriklə təchiz olunub, təxminən 600 at gücü hasil edir və 0-dan 100 km/saata beş saniyəyə çatır.

Ən bahalı avtomobillər siyahısında **Bugatti La Voiture Noire** da yer alır. Bu model 1936-cı ildə istehsal edilən "Bugatti Type 57SC Atlantic"dən ilhamlanaraq hazırlanıb və qiyməti 18,7 milyon dollardır.

Dünyanın ən bahalı 10 avtomobili:

1. Rolls-Royce La Rose Noire Droptail - 30 milyon dollardan çox
2. Rolls-Royce Boat Tail - 28 milyon dollar
3. Bugatti La Voiture Noire - 18,7 milyon dollar
4. Rolls-Royce Sweptail - 13 milyon dollar
5. Bugatti Chiron Profilée - 10,7 milyon dollar
6. Bugatti Centodieci - 8,8 milyon dollar
7. Mercedes-Maybach Exelero - 8 milyon dollar
8. Pagani Huayra Codalunga - 7,7 milyon dollar
9. Pagani Huayra Imola Roadster - 6 milyon dollar
10. Bugatti Divo - 5,5 milyon dollar

Dünyanın ən güclü avtomobilləri

"Visual Capitalist"in hazırladığı reytinqdə 2025-ci ilin ən güclü 20 avtomobili açıqlanıb. Siyahıya benzin, hibrid və elektrik mühərrikli modellər daxil edilib.

Lider isə "Koenigsegg Gemera" mhiperkarıdır. 2300 at gücünə malik hibrid qurğusu ilə fərqlənən bu model dörd oturacağa sahibdir və buna görə də "ailə hiperkari" adlandırılır.

Qeyd edək ki, "La Rose Noire Droptail"in alıcısının kimliyi gizli saxlanılır. Rolls-Royce yalnız onu "seçilmiş beynəlxalq sülalənin rəhbəri" kimi təsvir edib.

Hüseyn
Milli.Az