Ən çox şikayət edilən avtomobil markaları - Ustadan çıxmırlar

2024-cü ildə ən çox şikayət edilən avtomobil markaları və modelləri, müştəri məmnuniyyəti, etibarlılıq və geri çağırma statistikaları hazırlanıb.

Milli.Az xarici mətbuata istinadla xəbər verir ki, ən çox şikayət edilən və geriçağırılanlar siyahısında birinci yeri Ford tutub.

Ford

Bu avtomobillərlə bağlı ən çox şikayətlər sürət qutusu nasazlıqları, mühərrikin dayanması və multimedia sistemlərinin işləməməsi ilə bağlı olub.

2024-cü ilin ilk yarısında Ford 31 geri çağırma həyata keçirib və bu geri çağırmalar ümumilikdə 3.66 milyon avtomobili əhatə edib. Bu nəticə ilə Ford həmin dövrdə ən çox geri çağırma edən marka olub.

Tesla

Tesla markalı avtomobillərlə bağlı əsas şikayətlər proqram təminatı səhvləri, batareyanın zəif performansı, "phantom braking" hadisələri və odometr göstəricisinin manipulyasiyası iddiaları ilə bağlı olub.

2024-cü ildə Tesla 8 geri çağırma həyata keçirib və bu çağırmalar 2.55 milyon avtomobili əhatə edib.

Chevrolet

Chevrolet markalı avtomobillərlə bağlı əsas şikayətlər sürət qutusunun sarsıntılı işləməsi, kondisioner nasazlıqları və Bolt EV modelində batareya ilə bağlı yanğın riski ilə əlaqədar olub.

Xüsusilə Bolt EV sahibləri batareya sistemindəki problemlərə görə bir neçə geri çağırma ilə qarşılaşıblar. Bu, həm təhlükəsizlik, həm də etibarlılıq baxımından ciddi narahatlıqlar yaradıb.

Jeep

Jeep markalı avtomobillərlə bağlı əsas şikayətlər asqı siztemi nasazlıqları, su sızmaları və mühərrik xəbərdarlıq işıqlarının tez-tez yanması ilə bağlı olub.

Bu problemlər daha çox Wrangler və Grand Cherokee modellərində müşahidə edilib və istifadəçilər arasında narazılığa səbəb olub.

Hyundai və Kia

Hyundai və Kia markalı avtomobillərlə bağlı əsas şikayətlər mühərrik yanğın riski və elektrik sistemlərindəki nasazlıqlarla bağlı olub.

Xüsusilə Hyundai Tucson və Kia Sportage modelləri bu texniki problemlərlə əlaqələndirilib və bu hallar bir neçə geri çağırmaya səbəb olub.

Volkswagen

Volkswagen markalı avtomobillərlə bağlı əsas şikayətlər elektrik nasazlıqları, proqram təminatı səhvləri və sürət qutusu problemləri ilə bağlı olub.

Xüsusilə Atlas və ID.4 modelləri bu texniki problemlərlə əlaqələndirilib və istifadəçilər arasında narazılığa səbəb olub.

Ən etibarlı və istifadəçi məmnuniyyəti yüksək olan avtomobil markaları arasında Lexus, Toyota, Subaru, Buick və MINI fərqlənir.

Lexus ən yüksək etibarlılıq reytinqinə sahib olaraq lider mövqedə dayanır. Toyota və Subaru həm etibarlılıq, həm də istifadəçi məmnuniyyəti baxımından yüksək qiymətləndirilir. Buick markası da etibarlılığı və müştəri məmnuniyyəti ilə seçilir. MINI isə xüsusilə məmnuniyyət səviyyəsinə görə ön plana çıxır.

Əgər avtomobil almağı planlaşdırırsınızsa, Ford, Tesla, Jeep, Volkswagen və Chrysler kimi markaların bəzi modellərində tez-tez rast gəlinən problemləri və geri çağırmaları nəzərə alaraq diqqətli olmanız tövsiyə olunur.

İslam
Milli.Az