Erməni diasporu və kilsə PAŞİNYANA QARŞI

Ermənistan baş naziri Nikol Paşinyanın Qarabağın Azərbaycanın bir hissəsi kimi tanımasına qarşı erməni lobbisi genişmiqyaslı kampaniyaya start verib. Dünyaya səpənələn ermənilər kilsənin rəhbərliyi ilə Paşinyan hakimiyyətinə qarşı sərt çıxışlar erməyə başlayıb, onu hədələməkdədirlər. Avropanın aparıcı dövlətlərinin ərazisində yaşayan erməni icması Paşinyanın Qarabağı Azərbaycanın bir hissəsi kimi tanımaq bəyanatını pisləyib. Qlendeyl erməni icmasının nümayəndələri isə Qarabağın Azərbaycanın tərkibinə daxil edilməsi qərarına etiraz aksiyası keçiriblər. ABŞ-dakı erməni ruhani liderləri Cozef Baydeni Qarabağ ermənilərini Azərbaycanın bir hissəsi olmağa məcbur etmək cəhdlərinə müqavimət göstərməyə çağırır. "ArmInfo" Amerikanın Erməni Apostol, Katolik və Yevangel Kilsələrinin ruhani liderləri ABŞ prezidenti Cozef Baydenə müraciət edərək "Qarabağın erməni xristianlarını Azərbaycanın bir hissəsi olmağa məcbur etmək cəhdlərinə qəti şəkildə qarşı çıxmağa çağırıblar".

Kilsə Paşinyana qarşı

Amerika Erməni Milli Komitəsi (ANCA) tərəfindən yayılan məktubda "Ermənistanın bu qədim hissəsi"nin yerli əhalisinə qarşı etnik təmizləmə aparıla biləcəyi iddia edilib. Qarabağdakı erməni icması heyvana bənzədilir, bildirilir ki, "nəsli kəsilməkdə olan vətəndaşları"nın Azərbaycana tabe edilməsi erməniləri üçün ölüm hökmüdür. Məktubda deyilir: "Bir daha bədnam Azadlığa Dəstək Aktının 907-ci Bölməsindən imtinanı ləğv etmək və ABŞ qanununun bu müddəasını tam şəkildə yerinə yetirmək üçün uzunmüddətli çağırışlarımızla əlaqədar olaraq təcili müraciəti edirik". Sənəddə həmçinin xatırladılır ki, "Ermənistan dünyada soyqırımdan sağ çıxan, dənizə çıxışı olmayan ilk xristian xalqıdır, blokada vəziyyətində olduğundan sağ qalmağa can atır".

Beləliklə, bu faktlar Paşinyanla erməni diasporu arasında ciddi uçurum mövcudluğunu bir daha təsdiq edir. Və bu uçurumun başında da erməni kilsəsi dayanıb. Bundan əvvəl də baş nazirlə kilsə arasında qarşıdurmanın olduğu barədə məlumatlar erməni mediasında getmişdi. Baş nazir açıq şəkildə kilsəni tənqid edən fikirlər səsləndirmişdi.

Nikol Paşinyanın iqtidara gəlməsinə qədər diasporla Ermənistan dövləti arasında hər hansı ciddi böhran və ya anlaşılmazlıq müşahidə olunmayıb. 2020-ci ildəki Qarabağ müharibəsindən sonra Ermənistan və diaspor qüvvələri arasındakı münasibətlər kəskinləşib və münasibətlərdə uçurum yaranıb. Burada bir məsələ də var ki, Paşinyan diaspor təşkilatları tərəfindən illərdir ki, külli miqdarda pulların, böyük məbləğdə ianələrin toplandığı "Hayastan" ümumerməni xeyriyyə fondunun vəsaitlərinin mənimsənilməsi ilə bağlı qalmaqaldan sonra fondun qeyri-şəffaf idarə edilməsini əsas gətirərək edilən yardımlardan imtina etməsi münasibətlərdəki gərginliyi pik həddə çatdırdı. Diaspora və Paşinyan arasında son qarşıdurmalar da bunun növbəti təzahürüdür. Görünən odur ki, erməni diasporu bütün məğlubiyyətlərdə Paşinyanı günahkar bildiyi üçün, hər fürsətdə onu dalana dirəməyə çalışır.

Azər Nuriyev
Milli.Az