Cəmiyyət

"Gəncə Avropa Gənclər Paytaxtı 2016"nın açılış mərasimi keçirilib - FOTO

4 May 2016 12:52
Baxış: 1 637
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Bu gün Gəncə şəhərində "Gəncə Avropa Gənclər Paytaxtı 2016" layihəsinin açılış mərasimi keçirilib.

Milli.Az Kəpəz TV-yə (Region TV) istinadən xəbər verir ki, Heydər Əliyev Mərkəzində keçirilən tədbirdə Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Prezident İlham Əliyevin gənclərə təbrik məktubunu oxuyub.

Daha sonra Ə.Həsənov tədbir iştirakçıları qarşısında çıxış edib. Prezidentin ictimai-siyasi məsələlər üzrə köməkçisi çıxışında Azərbaycanın gənclər siyasətində qazandığı uğurlardan və topladığı təcrübədən danışıb. Ə.Həsənov qeyd edib ki, müstəqillik illərində Azərbaycanda gənclər siyasətinin uğurlu modeli formalaşıb. Azərbaycan Prezidenti tərəfindən gənclərlə bağlı Dövlət proqramları, o cümlədən "2015-2025-ci illərdə Azərbaycan gənclərinin İnkişaf Strategiyası" təsdiqlənib. Azərbaycandakı gənclər təşkilatları beynəlxalq gənclər platformaları ilə sıx əməkdaşlıq edir. Azərbaycan Avropanın nadir ölkələrindəndir ki, burada Gənclər və İdman Nazirliyi ilə yanaşı, Gənclər Fondu da fəaliyyət göstərir. Dövlət tərəfindən həm gənclər təşkilatlarına, həm də fərdlərin layihələrinə dəstək verilir. Fond fəaliyyət göstərdiyi 4 il ərzində 3226 layihəni maliyyələşdirib.

Azərbaycan Prezidenti İlham Əliyevin "Gəncə şəhərinin "2016-cı il Avropa gənclər paytaxtı" seçilməsi ilə əlaqədar tədbirlər haqqında Sərəncam imzaladığını diqqətə çatdıran Ə.Həsənov şəhərdə il ərzində maraqlı layihələr həyata keçiriləcəyini bildirib, Azərbaycanın növbəti dəfə beynəlxalq tədbirə ən yüksək səviyyədə ev sahibliyi etməyə qadir olduğunu göstərəcəyinə əminliyini ifadə edib.

Gənclər və İdman naziri Azad Rəhimov isə Gəncənin Avropanın Gənclər Paytaxtı seçilməsinin şəhər və gənclər üçün əhəmiyyətini vurğulayıb.

Avropa Gənclər Forumunun idarə heyətinin üzvü Lora Lübonova, Avropa Gənclər paytaxtları şəbəkəsinin icraçı direktoru Andras Farkas çıxışlarında Avropanın Gənclər paytaxtı seçilməsinin Gəncəyə köhnə qitə ilə əlaqələri inkişaf etdirmək üçün daha böyük şans verəcəyinə diqqət çəkiblər. Bu, gənclər üçün də əlavə imkanlar yaradır. Bir il ərzində onlar avropalı həmyaşıdları ilə də sıx əlaqə yarada biləcəklər.

Əskişəhər valisi Əzim Tunar Güngör isə çıxışında Gəncənin bu titula yiyələnməsinin ortaq mədəniyyət və işbirliyi baxımından əhəmiyyətinə diqqət çəkib.

Qeyd edək ki, açılış mərasiminə İrlandiya, İtaliya, Portuqaliya, Macarıstan, Polşa, Rumıniya, Sloveniya, Yunanıstan, Bolqarıstan və digər ölkələrdən nümayəndələr dəvət olunublar.

Proqrama Gəncə şəhərindəki Gənclər Evinin və "Gəncə - Avropa Gənclər Paytaxtı 2016" İctimai Birliyinin ofisinin açılışı, müxtəlif sərgilərin təşkili, Avropa Paytaxtları Şəbəkəsinin görüşü, "Qadınlar zirvədə" layihəsinin təqdimatı və digər tədbirlər də daxildir.

"Avropa Gənclər Paytaxtı" layihəsi ilk dəfə 2009-cu ildə Avropa Gənclər Forumu tərəfindən irəli sürülüb. Layihənin məqsədi yerli və xarici gənclər təşkilatlarının beynəlxalq əməkdaşlığının inkişaf etdirilməsi, Avropa gənclər paytaxtları seçilmiş şəhərlərin aid olduğu ölkələrin gənclər təşkilatları milli şuraları arasında təcrübə mübadiləsinin aparılmasıdır.

Avropanın ilk gənclər paytaxtı 2009-cu ildə Niderlandın Rotterdam şəhəri seçilib. Daha sonra Turin (İtaliya), Antverpen (Belçika), Braqa (Portuqaliya), Maribor (Sloveniya), Saloniki (Yunanıstan), Kluj Napoca (Rumıniya) Avropa gənclər paytaxtları olub. Gəncə bu estafeti qəbul edən 8-ci şəhərdir. Onun 2016-cı ildə "Avropa Gənclər Paytaxtı" seçilməsi barədə qərar 2013-cü il aprelin 10-da Yunanıstanın Saloniki şəhərində elan edilib.

Milli.Az

Məqaləyə dair fotomateriallar:

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.