Siyasət

Tufan Kərim yenə tufan qoparır

19 Yanvar 2012 10:18
Baxış: 633
"İctimai Palatanın kütləvi etiraz aksiyalarına başlamaq qərarı bu strukturun növbəti populist, heç bir mənası olmayan açıqlamalarından biridir. Bu təşkilat indiyədək həmişə aktiv hərəkətlərdə olduğunu desə də, İctimai Palatadan passivlik və ictimai rəydə çəkisizlikdən savayı, heç nə nəyə nail olmayıb".

Bunu Milli.Az-a açıqlamasında Azərbaycan Milli Demokrat Partiyasının (Boz Qurd) sədri Tufan Kərim dedi. Onun sözlərinə görə, İctimai Palatanın belə bəyanatla çıxış etməsi həmişəki kimi, müəyyən məqamlardan bəhrələnərək özünə xal yığmaq istəyindən başqa heç nə deyil.

"Partiya olaraq İctimai Palata ilə bağlı mövqeyimizi indiyədək dəfələrlə konkret şəkildə bildirmişik və bununla bağlı zamanında bəyanat da vermişik. İctimai Palataya əhəmiyyətsiz, marginal qurum kimi baxırıq və mövqeyimizi həmin strukturun hansısa bəyanatından asılı olaraq dəyişmək niyyətində deyilik. Adını çəkdiyim təşkilatın qeyri-ciddi addımları yalnız populizm xatirinə atılır. İctimai Palatanın mahiyyəti və məqsədləri, orada təmsil olunanların kimlər olduğu bəllidir. Bu insanları cəmiyyət yaxşı tanıyır. Bir, iki il deyil - on illərdir ki, həmin adamlar yerlərində sayırlar və cəmiyyət də onlara əla bələddir", - T.Kərim dedi.

"Boz qurdlar"ın liderinin sözlərinə görə, İctimai Palata hansısa ictimai, siyasi və s. məqsədlərə çatmaq iqtidarında deyil. Partiya, əslində, sözügedən strukturdan belə fəaliyyəti də gözləmir.

"Sözün açığı, İctimai Palatanın hansısa uğura nail olacağını düşünmürük. O strukturda təmsil olunanların əksəriyyəti fərdi və qrup mənafelərinə xidmət edir. Orada gündəmdə milli maraq yoxdur. Azərbaycanın milli maraqlarının olmadığı yerdə də bizi heç bir qurum, fərd və ya şəxs maraqlandırmır. Əgər orada milli maraqların təminatına yönəlmiş hansısa fəaliyyət olsaydı, təbii ki, İctimai Palataya müsbət yanaşardıq. Bu səbəbdən də İctimai Palatanı və onun fəaliyyətini əhəmiyyətsiz hesab edirik", - T.Kərim bildirdi.

O, AMDP-nin müxalifət düşərgəsindəki mövcud qrup, birlik və ya koalisiyaya qoşulmaq fikrində olmadığını deyib: "Həmişə demişik ki, milli maraqların təminatına yönəlmiş səylər, cəhdlər və fəaliyyət görəriksə, belə struktura qatılarıq. Lakin hələ ki, apardığımız müşahidələr müxalifətdə birliyə yönəlmiş işlə məşğul olduğunu bildirənlərdə belə fəaliyyətin olmadığını göstərir".

Orxan Hun
Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.