Dünya

Yaponiyada koronavirusa yoluxanların sayı artmaqda davam edir

20 Noyabr 2020 20:46
Baxış: 286

Yaponiyanın hakimiyyət orqanları noyabrın 19-da ölkə üzrə daha 2400-ə yaxın koronavirusa yoluxma halı aşkar edildikdən sonra əhalini ehtiyat tədbirlərinə ciddi əməl etməyə çağırıb.

Milli.Az AZƏRTAC-a istinadən bildirir ki, ölkə üzrə iki gündür rekord səviyyədə yoluxma qeydə alınır. Bildirilir ki, paytaxt Tokio virusun yayılması üzrə episentrə çevrilib. Noyabrın 19-da burada 534 yoluxma halı qeydə alınıb.

Tokio bələdiyyəsi sentyabrdan bəri ilk dəfə olaraq koronavirus təhlükəsi səviyyəsini ən yüksək - dördüncü həddə qaldırıb.

Paytaxtda daha bir təhlükəli tendensiya qeydə alınıb. Belə ki, əldə edilən məlumatlara görə, yoluxma mənbəyi məlum olmayan xəstələrin sayı sürətlə artır.

Tokionun qubernatoru xanım Koike Yuriko paytaxt sakinlərini insanların yeni ili qarşılamağa hazırlaşdığı bir vaxtda daha diqqətli olmağa çağırıb.

"Biz səhhətində problem olan insanlara kollektiv axşam yeməyindən imtinanı tövsiyə edirik. Valideynləri və digər qohumları ilə birlikdə yaşayanlara da birgə yeməkdən çəkinməyi tövsiyə edirik", - deyə K.Yuriko bildirib.

Qubernator, həmçinin ictimai iaşə obyektlərindən istifadə ilə əlaqədar xüsusi strategiya təklif edir. Bu, həmin yerlərdə daha az insanın toplanmasını, söhbət zamanı daha aşağı səslə ünsiyyəti, kiçik ölçülü boşqablardan istifadəni və həmin yerlərin havasının tez-tez dəyişdirilməsini nəzərdə tutur.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.