Dünya

10 milyona yaxın uşaq təhsilini yarımçıq qoya bilər

13 İyul 2020 23:20
Baxış: 1 435

Koronavirus pandemiyasından sonra kasıblığın artması və təhsil sahəsinə büdcə xərclərinin azaldılması səbəbindən dünyada ən azı 9,7 milyon uşaq ilin sonunadək təhsilini dayandıra bilər.

Milli.Az AZƏRTAC-a istinadən bildirir ki, bu barədə məlumat "Save the Children" beynəlxalq xeyriyyə təşkilatının məruzəsində əksini tapıb.

Məlumata əsasən, koronavirus pandemiyası səbəbindən yaxın 18 ayda bəzi kasıb ölkələrdə təhsil xərcləri təxminən 77 milyard dollar azalacaq. Bu səbəbdən 40 ölkədə yaşayan uşaqlar təhsilini birdəfəlik dayandıraraq pul qazanmaq məcburiyyətində qala bilər. Hazırda ən mürəkkəb vəziyyət 12 ölkədə - Afrikanın bir sıra dövlətlərində, həmçinin Yəmən və Əfqanıstanda qeydə alınıb.

Pandemiyanın yayılmasının qarşısını almaq məqsədilə təhsil müəssisələrinin bağlanması ibtidai və orta məktəblərdə oxuyan 1 milyarddan çox uşağa təsir edib. Onların 500 milyonunun distant təhsil almaq imkanı yoxdur.

Məruzə müəllifləri milli hökumətləri və donor-təşkilatlarını təhsilə əlavə vəsait ayırmağa çağırıb. Dünya Bankı bu məqsədlə 35 milyard dollar təqdim edəcək. Kommersiya kreditorları kasıb ölkələrdən ödəniş almağı dayandırsa, bu, əlavə olaraq sonradan təhsil sahəsinə 14 milyard dollar ayırmağa imkan yaradacaq.

Qeyd edək ki, mənzil-qərargahı Londonda yerləşən "Save the Chilren" beynəlxalq xeyriyyə təşkilatı bütün dünya üzrə uşaqlara qida və yaşayış yeri əldə etmək, həmçinin təhsil və səhiyyə xidmətləri almaq üçün yardım edir. Onun fəaliyyəti milli hökumətlər, iri kommersiya kompaniyaları və fərdi xeyriyyəçilər tərəfindən maliyyələşir. Təşkilatın hesabatına əsasən, 2018-ci ildə onlar 2,2 milyard dollardan çox vəsait cəlb etməyə nail olub.

Milli.Az

loading...

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.