On minlərlə qəzəbli müsəlman küçələrə çıxdı - FOTO

Milli.Az AsiaOne-a istinadən bildirir ki, ötən həftə yaşanan toqquşmalarda isə 14 nəfər həlak olmuşdu.

Toqquşmaların səbəbi Banqladeşin ən böyük müxalifət təşkilatı olan "Cəmaəti İslami" Partiyasının (Islami Andolan Bangladesh, İAB) bir dəstə üzvünün həbsi idi. Daha sonra isə Siracqanc əyalətində iqtidar tərəfdarları olanlar silahlanaraq "Cəmaete İslami"nin üzvlərinə hücum ediblər.

Toqquşmaya polis qatılıb, "Cəmaəti İslami" üzvlərinə qarşı gözyaşardıcı qaz, su şırnaqları və dəyənəklərdən istifadə olunub.

Son iki ayda Banqladeşdə toqquşmalarda 80 nəfər həlak olub.

Dünən isə Banqladeşin paytaxtı Dəkkədə on minlərlə İAB üzvü küçələrə çıxaraq ölkədə İslamı təhqir edənlərə qarşı sərt tədbirlər görülməsini tələb ediblər.

Onlar internetdə İslamı və müsəlmanları aşağılayanların cəzalandırılmasını, ölkə parlamentində İslama qarşı çıxanların qanun qarşısında cavab vermələrini istəyiblər.

İAB üzvləri onu da bəyan ediblər ki, əgər onların tələbləri qəbul edilərək yerinə yetirilməzsə, aprelin 25-də Banqladeşin baş naziri Şeyx Hasinanın iqamətgahını mühasirəyə alacaqlar.

İAB-ın lideri, Əmir Müfti Seyid Məhəmməd Rezaul Karim dünənki mitinqdə çıxış edərkən deyib: "Əvvəlki iqtidarlar təki, indiki hökumət və hakimiyyət də rüşvət, zorakılıq, qohumbazlıq, korrupsiya və digər naqisliklər, çirkab içindədir. Biz bu adamları hakimiyyətdən kənarlaşdırmalı, ölkənin inkişafına mane olan qüvvələri zərərsizləşdirməliyik", - banqladeşlilərin "Pir Şaheb Çarmonay" adlandırdıqları Kərim deyib.

İAB ölkədə azad və ədalətli seçkilərin keçirilməsini, korrupsiya ilə effektiv mübarizə aparılmasını, məmurların harınlıq və özbaşınalıqlarına son qoyulmasını tələb edir.
Partiya onu da bildirir ki, Banqladeşin dövləti müstəqilliyi əldə etməsində müstəsna xidmətləri olan "mömin müsəlmanlara qarşı təqiblərə son qoyulmalıdır".

1971-ci ildə Banqladeşin milli müstəqillik savaşında 3 milyon nəfər həlak olmuş, 200 mindən artıq müsəlman qadın zorlanmışdı.

Milli.Az