Dünya müharibəsi olarsa, qaçmağa yalnız 6 ölkə var

Bu ölkələr əsas döyüş zonalarından uzaqda yerləşir və sabit iqtisadiyyata malikdir.

Milli.Az xarici mediaya istinadən xəbər verir ki, qlobal müharibə ehtimalı olacağı təqdirdə bir çox insan hansı ölkələrə gedəcəyini müəyyənləşdirib.

İrlandiya - döyüş zonalarından təcrid olunub.

İrlandiya Avropada unikal mövqeyə malikdir: coğrafi baxımdan Atlantik okeanı ilə materikdən ayrılıb, lakin siyasi və iqtisadi cəhətdən Avropa İttifaqına sıx inteqrasiya olunub. Hərbi baxımdan neytral dövlətdir və NATO üzvü deyil. Bu səbəbdən Avropadakı münaqişələrdə birbaşa iştirak ehtimalı daha azdır. Böhran şəraitində ölkənin sabit ərzaq təminatı və güclü kənd təsərrüfatı sektoru böyük üstünlük sayılır.

İsveçrə - "sağ qalma" modeli olan dövlət

İsveçrə müasir Avropanın ən məşhur təhlükəsizlik modellərindən biridir və yüz ildən artıqdır ki, neytrallıq prinsipini qoruyur. Ölkədə unikal müdafiə infrastrukturu mövcuddur: yüz minlərlə sığınacaq var və qanunvericilik yeni tikililərdə belə obyektlərin olmasını tələb edir. Bundan əlavə, mərkəzsiz dövlət quruluşu, sabit bank sistemi və yüksək özünütəminetmə səviyyəsi böhranlara davamlılığı artırır. Yüksək yaşayış xərcləri yüksək maaşlar və yaxşı təşkil olunmuş əmək bazarı ilə kompensasiya olunur.

Portuqaliya - münaqişə zonasından uzaqda

Portuqaliyanın əsas üstünlüyü onun coğrafi mövqeyidir: Avropanın ən qərb ölkəsi olaraq, potensial münaqişələrin daha çox baş verə biləcəyi şərq hissəsindən xeyli uzaqda yerləşir.

Turizm, tikinti, kənd təsərrüfatı və güclü rəqəmsal sektor ölkə iqtisadiyyatının inkişafına imkan yaradır. Yaşayış xərcləri, xüsusilə mənzil və ərzaq Qərbi Avropanın əksər ölkələri ilə müqayisədə daha aşağıdır ki, bu da böhran vəziyyətində mühüm amil ola bilər.

Portuqaliya uzun illərdir Qlobal Sülh İndeksinə görə, dünyanın ən sülhsevər ölkələri sırasında yer alır ki, bu da siyasi sabitlik və daxili gərginliyin aşağı səviyyədə olduğunu göstərir.

İslandiya - təcrid və sistem sabitliyi

İslandiyanın təcrid olunması onun əsas təhlükəsizlik üstünlüklərindən biridir: Şimali Atlantik okeanında yerləşən bu ada Avropadakı mümkün müharibə zonalarından xeyli uzaqdadır. Ölkənin ən böyük üstünlüklərindən biri enerji müstəqilliyidir. Elektrik enerjisinin demək olar ki, hamısı geotermal və hidroenerji kimi bərpa olunan mənbələrdən əldə edilir.

Yaşayış xərcləri Avropa ortalamasından yüksək olsa da, əmək bazarı nisbətən çevikdir, xüsusilə turizm, balıqçılıq, təhsil və xidmət sahələrində.

Yeni Zelandiya - dünyanın kənarında yerləşən ölkə

Yeni Zelandiya Avropadan və əksər qlobal münaqişə zonalarından çox uzaqda yerləşir. Sabit demokratik sistem, proqnozlaşdırıla bilən hüquqi mühit və aşağı korrupsiya səviyyəsi onu yaşamaq üçün ən rahat ölkələrdən birinə çevirir.

Lakin immiqrasiya qaydaları sərtdir: daimi yaşayış icazəsi almaq üçün viza tələb olunur və əsas yollarından biri "Yaşıl siyahı" sistemidir. Bu sistem mühəndislik, səhiyyə və tikinti kimi peşə çatışmazlığı olan sahələrə yönəlib. 

Uruqvay - ekzotik, lakin sabit alternativ

Uruqvay Latın Amerikasının ən sabit ölkələrindən biridir və adətən "Cənubi Amerikanın İsveçrəsi" adlandırılır. Demokratik institutlar güclüdür, siyasi dəyişikliklər sülh yolu ilə baş verir və iqtisadiyyat əsasən kənd təsərrüfatı məhsullarının ixracına əsaslanır ki, bu da ərzaq təhlükəsizliyi baxımından böyük üstünlükdür.

Ölkəyə giriş və iş icazəsi nisbətən tez əldə oluna bilər ki, bu da böhran vəziyyətində ciddi üstünlük sayılır. Yaşayış xərcləri bir çox Qərb ölkələri ilə müqayisədə daha münasibdir, həyat səviyyəsi və ictimai təhlükəsizlik isə regionun digər ölkələri ilə müqayisədə kifayət qədər yüksəkdir. (Lent.az)

Milli.Az