Dünya

UNESCO-ya yeni rəhbər seçildi

6 Oktyabr 2025 20:52

Baxış: 377

VTB-də yüksək depozit faizleri daha çox qazandırır

#UNESCO

UNESCO-nun İcraiyyə Şurasının Parisdə keçirilən 222-ci sessiyasında səsvermənin nəticələri elan edilib.

Misirli alim və siyasətçi Xalid əl-Enani səsvermədə 55 səs toplayaraq, cəmi 2 səs qazanan Konqo Respublikasının namizədi Firmin Eduar Matokonu geridə qoyub. Bu, UNESCO tarixində ən böyük səs fərqi ilə qələbə hesab olunur.

1971-ci ildə Qizada anadan olan Xalid əl-Enani misirşünas alim və akademikdir. O, 2019-2022-ci illərdə Misirin Turizm və Qədim Əsərlər naziri vəzifəsində çalışıb, bundan əvvəl isə Qahirə Misir Muzeyinə rəhbərlik edib və Helvan Universitetində Misirşünaslıq üzrə professor olub.

Helvan Universitetinin Turizm və Otel İdarəçiliyi fakültəsini bitirən əl-Enani, 1996-cı ildə Misirşünaslıq üzrə magistr dərəcəsi alıb, 2001-ci ildə isə Fransanın Pol Valeri Montpellier III Universitetindən doktorluq dərəcəsi qazanıb.

Ərəb, ingilis və fransız dillərini sərbəst bilən əl-Enani, Böyük Misir Muzeyi (GEM) də daxil olmaqla bir sıra iri mədəni irs layihələrinə rəhbərlik edib və beynəlxalq mədəni əməkdaşlıqlarda fəal rol oynayıb.

2025-ci ilin sentyabr ayında Xalid əl-Enani Fransanın ən yüksək mülki ordeni sayılan Şöhrət Legionunun Cəngavəri nişanı ilə təltif olunub.

Fransanın Misirdəki səfiri Erik Şevalye onun "təhsil, mədəniyyət, elmi araşdırmalar və mədəniyyətlərarası dialoqa verdiyi əvəzsiz töhfələri" yüksək qiymətləndirib.

Lalə Qüdrətova
Milli.Az