Yeni papa türkiyəlidir? - Ailə sirri üzə çıxdı

Katolik Kilsəsinin yeni ruhani lideri, Vatikanın prezidenti Papa XIV Leo-nun əsli ilə bağlı yerli və beynəlxalq mediada müzakirələr gündəmdədir.

Milli.Az xəbər verir ki, yerli mətbuat və sosial mediada yayılan məlumatlara görə, Papa XIV Leo-nun ulu babası Setrak Parsehyan 1915-ci ildə Kayserinin Develi rayonundan Cənubi Amerika ölkəsi Argentinaya köç edib. Bu iddia Develi sakinləri arasında təəccüblə qarşılanıb.

Reşadiye məhəlləsinin muxtarı Yusuf Çelik bildirib ki, "Biz də sosial şəbəkələrdən Papanın Dəvəlili olduğunu öyrəndik və təəccübləndik. Deyilənə görə, XIV Leo-nun babaları bu məhəllədə yaşayıb".

Digər tərəfdən, ABŞ mətbuatı xüsusilə də "The New York Times" fərqli məlumatlar yayımlayıb. Məlumata əsasən, Papa XIV Leo-nun kökləri ABŞ-ın Yeni Orlean şəhərindəki qaradərili kreol icmasına dayanır. Jari C. Honora adlı şəcərəşünasın araşdırmalarına görə, Papanın nənə və babası "qara" və "mulatto" (qarışıq irq) kimi qeydə alınıb və 20-ci əsrin əvvəllərində Yeni Orleandan Çikaqoya köç edərək burada Papanın anası Mildred Martinez dünyaya gəlib.

Honora-nın təqdim etdiyi sənədlər - nikah şəhadətnamələri və 1900-cü il siyahıyaalması - Papanın ailəsinin Karib və Haiti əsilli olduğunu göstərir. Məlumata görə, baba Martinez "qara", doğum yeri "Hayti" (Haiti), peşəsi isə "siqaret istehsalçısı" kimi qeyd olunub.

Papanın qardaşı Con Prevost isə ailələrinin ata tərəfdən fransız əsilli olduğunu və ABŞ-da anadan olduqlarını bildirib. O, ailənin heç vaxt kreol mənşəyi barədə danışmadığını və bunun problem olmadığını vurğulayıb.

Beləliklə, Papa XIV Leo-nun əsli ilə bağlı fərqli versiyalar mövcuddur: biri onun Türkiyənin Develi rayonundan olan erməni köklü bir ailədən gəldiyini, digəri isə kreol və Karib mənşəli olduğunu iddia edir. Bu ziddiyyətli məlumatlar Papa XIV Leo-nun hələ də dəqiqləşdirilməmiş qalmasına səbəb olur.

Fidan
Milli.Az