Paşinyan düsturu: Kremli söy və Rusiyadan milyardlar qazan!

Əgər hansısa təşkilat Ermənistanın suverenliyinə və dövlətçiliyinə təhlükə yaradırsa, onun mövcudluğu bir yana qalsın, onu məhv etmək lazımdır. Niyə Ermənistan hələ də təhlükəsizliyinə və dövlətçiliyinə təhdid olan bir təşkilatın üzvüdür - bu, Paşinyanın çox məxfi bir fiqur kimi sona qədər açıqlamayacağı dövlət sirridir.

Milli.Az axar.az-a istinadən xəbər verir ki, bu sözləri erməni ekspert Avetis Babacanyan Nikol Paşinyanın KTMT-ni Ermənistanın suverenliyinə təhdid hesab etməsi barədə açıqlamasını şərh edərkən yazıb.

O bildirib ki, Paşinyan həqiqətən hara gedəcəyinə qərar verə bilmir:

"Şərq, yoxsa Qərb, Rusiya, yoxsa AB və ABŞ? O, KTMT və Aİİ üzvü olaraq qalmalıdır, yoxsa həmin strukturları tərk etməli, orada gözlənilmədiyini bilə-bilə AB və NATO-ya üz tutmalıdır? Paşinyan üçün şəxsiyyətin bu ikililiyinin sadə izahı var. O, ABŞ tərəfindən hakimiyyətə gətirilib və onun gücünün xarici dəstəkçisi ABŞ və AB-dir, lakin hakimiyyəti saxlamaq üçün pul da lazımdır və o pul Rusiya ilə ticarətdən gəlir. O pul olmasa, ölkədə elə bir üsyan inkişaf edəcək ki, heç bir Amerika dəstəyi onu xilas edə bilməyəcək. Hətta öz komanda yoldaşları da pulsuz ona xidmət etməyəcək. Odur ki, Paşinyan bir tərəfdən KTMT əleyhinə danışır, Qərbi özünə cəlb etməyə çalışır, digər tərəfdən Aİİ üzvü olmaqda davam edir, həmin strukturun üzvləri ilə sərfəli ticarət imkanlarını qoruyur, amma eyni zamanda AB üzvlüyündən bəhs edir. Kimsə deyə bilər ki, bu, heç bir perspektivi olmayan əyrilikdir, amma Paşinyan bunun əksini sübut edir. O, sübut edir ki, necə bu qədər antirusiya olmaq və eyni zamanda Rusiya ilə ticarəti artırmaq olar".

Ekspertin fikrincə, Ermənistanın AB-yə üzv olması ehtimalı sıfra bərabərdir:

"Ermənistanın AB-yə üzvlüyü yuxu deyil, xəyaldır, daha dəqiq desək, kabusdur. Ermənistanın AB ilə, xüsusən də iqtisadi baxımdan, heç bir əlaqəsi yoxdur. Ölkələr əsasən öz iqtisadi maraqlarına xidmət etmək üçün birləşir və ya müttəfiq olurlar. AB-nin üzvü olub, Aİİ ilə ticarəti artırmaq mümkün deyil, əksinə, AB-yə üzvlük Ermənistanı Aİİ və onun əsas ölkəsi olan Rusiya ilə bütün ticarət-iqtisadi əlaqələri dayandırmağa məcbur edəcək. Paşinyan bilir ki, bu, nəinki Ermənistanın, həm də hakimiyyətinin sonu olacaq. O, təhdid deyəndə bunu nəzərdə tutur, çünki onun gücünün əsasını AB və ya ABŞ-dan gələn vədlər və ya kreditlər deyil, Rusiya ilə ticarət nəticəsində formalaşan çoxmilyardlı gəlirlər təşkil edir.

Beləliklə, Paşinyanın siyasi konsepsiyası belədir: KTMT-ni söyür, amma Aİİ çərçivəsində pul qazanır, AB-yə daxil olmaq istəyindən və Avropa dəyərlərinə sədaqətindən danışır, bunun müqabilində Qərbin onun diktator addımlarına laqeydliyini gözləyir. Ermənistan üçün nəticələr faciəli olsa da, Paşinyanın öz gücünü saxlamaqda uğuru göz qabağındadır".

Milli.Az
​Xəbərlərimizi WhatsApp kanalımızdan da oxuyun