İdman

Osimhen dostunu da “Qalatasaray”a gətirir - böyük transfer SÜRPRİZİ

15 Oktyabr 2025 12:42

Baxış: 7 142

VTB-də minimal faiz dərəcəsi ilə nağd kredit 9.9%-dən

#TRANSFERLƏR #QALATASARAY #FUTBOL

Türkiyənin "Qalatasaray" klubu həm Super Liqada, həm də Çempionlar Liqasında uğurla çıxışını davam etdirərkən, qış transfer pəncərəsi üçün hazırlıqlara start verib.

Milli.Az Türkiyə mətbuatına istinadən xəbər verir ki, sarı-qırmızılılar Nigeriya millisində Viktor Osimhenlə birlikdə oynayan Rafael Onyedikanı transfer etmək istəyir.

Son üç mövsümün çempionu olan "Qalatasaray" topladığı 22 xalla millilər üçün yaranan fasiləyə lider kimi yollanıb. Komanda Çempionlar Liqasında səfərdə "Ayntraxt"a uduzsa da, ev oyununda "Liverpul"u məğlub edib. Baş məşqçi Okan Buruk və klub rəhbərliyi qışa qədər həm liqada, həm də Avropada mövqelərini qorumağı planlaşdırır.

Məlumata görə, komandanın heyətində qapı, müdafiə və hücum xəttində kifayət qədər alternativ olsa da, orta sahədə seçim azdır. Okan Buruk bu səbəbdən yarımmüdafiəyə yeni oyunçu cəlb etməyə qərar verib.

Klubun transfer siyahısında birinci yerdə "Klub Brügge"də çıxış edən Rafael Onyedika yer alır. 6 və 8 nömrəli mövqelərdə oynaya bilən nigeriyalı futbolçu mövsümün sonunda komandadan ayrılması gözlənilən Leminanın əvəzləyicisi kimi nəzərdən keçirilir. Onyedikanın transfer qiyməti 15-20 milyon avro aralığında dəyərləndirilir.

Nigeriyalı yarımmüdafiəçi artıq milli komandadakı dostu Viktor Osimhendən "Qalatasaray" haqqında məlumat almağa başlayıb. Onyedika bu mövsüm "Klub Brügge"in heyətində bütün turnirlərdə 14 oyuna çıxıb, 982 dəqiqə meydanda olub, 1 qol və 1 məhsuldar ötürmə ilə yadda qalıb.

Tural
Milli.Az