114 yaşlı idmançını maşın vurub öldürdü

Hindistanın Baş naziri Narendra Modi, 114 yaşında dünyasını dəyişən məşhur marafonçu Fauja Singhin vəfatı ilə bağlı başsağlığı verib. O, Singh-in fiziki hazırlıq sahəsində Hindistan gənclərinə ilham verən unikal şəxsiyyət olduğunu bildirib.

"Əmmaməli Qasırğa" ləqəbli əfsanəvi idmançı qəza nəticəsində vəfat edib.
Dünyanın müxtəlif ölkələrindən insanlar Fauja Singh-in itkisinə kədərlənərkən, onun ölümünə səbəb olan avtomobil sürücüsü hələ də axtarılır.

Hadisə Pəncab əyalətinin Cələndhar rayonundakı Bias kəndində baş verib. Singh yolu keçərkən naməlum avtomobil tərəfindən vurulub. Hadisə zamanı o, evindən cəmi 400 metr uzaqda imiş.

Kənd sakini Mahinder Singhin PTI agentliyinə verdiyi məlumata görə:

"Bu ərazi əsas magistral yoldur. Vurulduqdan sonra onu yaxınlıqdakı xəstəxanaya apardıq, amma aldığı ağır xəsarətlər nəticəsində həyatını itirdi. Bəzi şahidlər deyirlər ki, Fauja Singh SUV tipli avtomobillə vurulub və 5-7 fut (1.5-2 metr) havaya qalxıb."

Cələndhar polisi bildirib ki:

Hadisəni törədən şəxs naməlum avtomobillə hadisə yerindən qaçmağa müvəffəq olub.

Onun tapılması və saxlanılması üçün axtarış işləri davam etdirilir.

Fauja Singh kim idi?
"Əmmaməli Qasırğa" (Turbaned Tornado) ləqəbi ilə tanınan Singh, 100 yaşından sonra da marafonlarda iştirak etmişdi.

O, dünyanın ən yaşlı marafonçusu kimi tanınır və qocalıqda sağlam həyat tərzinin simvoluna çevrilmişdi.

Baş nazir Modi: "O, qeyri-adi bir insan idi"
Narendra Modi Singh haqqında paylaşımında deyib:

"Fauja Singh yalnız yaşına görə yox, enerjisi, ruhu və idmana olan sevgisi ilə də qeyri-adi insan idi. O, Hindistan gənclərinə sağlam və aktiv həyatın əsl nümunəsi idi."

Fauja Singh-in ölümü yalnız Hindistan üçün deyil, dünyada ilhamverici idmançılara dəyər verən hər kəs üçün böyük bir itkidir. Allah rəhmət eləsin.


Lalə Qüdrətova
Milli.Az