İdman

"Qarabağ"ın transfer tərəddüdü - yeni detallar

5 Yanvar 2025 23:35

Baxış: 2 268

VTB-də minimal faiz dərəcəsi ilə nağd kredit 9.9%-dən

#AZƏRBAYCAN FUTBOLU

Elvin Bədəlovun "Qarabağ"a transferi növbəti dəfə baş tutmaya bilər.

Ötən yay təcrübəli müdafiəçi özü "Sumqayıt"da qalmağa qərar vermişdisə, bu dəfə keçidin düyünə düşməsinə səbəb "Qarabağ" tərəfinin tərəddüd etməsidir.

Düzdür, "Sportinfo"nun bu transfer xəbərini yayımlamasından sonra Ağdam təmsilçisi və futbolçu özü mətbuata açıqlamalarında ortada hər hansı danışıq, rəsmi təklif olmadığını iddia edib.

Amma əsil həqiqət tam başqadır.

Həm ötən yay, həm də qış fasiləsində "köhlən atlar" rəsmi olaraq Elvin Bədəlov üçün onun məxsus olduğu "Sumqayıt" klubuna rəsmi müraciət edib.

Hətta ötən ilin sonu tərəflər arasında böyük ölçüdə razılıq da əldə olunub. "Qarabağ" stoperə görə təzminat ödəməyə belə hazır idi.

Belədə bəs niyə transfer gerçəkləşmir?

Bunun yeganə səbəbi növbəti mövsüm Premyer Liqada legioner limitinin ləğv edilmə ehtimalının hazırda yüksək olmasıdır.

Yaxın günlərdə AFFA İcraiyyə Komitəsinin növbəti iclası nəzərdə tutulub.

Məhz həmin iclasda limitin aradan götürülməsi qərarının açıqlanması ehtimalı kifayət qədər böyükdür.

Yuxarıda qeyd etdiyimiz tərəddüd bu səbəbdəndir.

Belə ki, "Qarabağ"ın Bədəlov seçimi onun yerli statusu daşımasıdır.

Qurban Qurbanovun planında təcrübəli futbolçunun xidmətindən daha çox daxili yarışlarda istifadə etməkdir.

Limit qadağası aradan götürüləcəyi təqdirdə artıq bu transferin ciddi bir əhəmiyyəti qalmır.

Klub belə olan halda əlavə xərcə düşmək istəmir. (sportinfo.az)

Milli.Az