Fikrət Qoca: "Qorxuram ki, ölmək lazım gələndə ölə bilməyəm"

- Sizə görə həyatda ən asan və ən çətin şey nədir?

- Ən asan şey yaşamaqdı. Ən çətin şey də insan kimi yaşamaqdı.

- Ucqar bir kənddə yaşamağa məcbur olsaydınız, dolanışığınızı necə çıxarardınız?

- Torpaqdan çıxarardım. Əcdadım kimi, minnətsiz.

 - Keçdiyiniz ömür yoluna baxanda ən çox nəyə üzülür, nəyə sevinirsiniz?

- Üzülürəm ki, az iş görmüşəm. Sevinirəm ki, sağam, hələ iş görə bilirəm.

- Valideyn və müəllimlərdən başqa özünüzü kimlərə borclu bilirsiniz?

- Bütün rast gəldiyim yaxşı insanlara.

- Uğrunda hər şeydən keçə biləcəyiniz varlığın adı?

- Vətən - Azərbaycanım.

 - Özünüzü hansı peşədə daha yaxşı ifadə edə bilərdiniz?

- Öz peşəmdən razıyam, elə onunla da məşğulam.

- Üzr istəmək sizə ağır gəlmir ki?

- Günahkar olanda üzr istəmək imkanım olmasa, özümü çox pis hiss edirəm.

- Sabir deyir: "Ağladıqca kişi qeyrətsiz olur", siz necə düşünürsünüz?

- İnsan sevincdən də, kədərdən də ağlamağı, gülməyi bacarmalıdı. Burada ürəyinin səsinə qulaq asmalıdır. Gülməli yerdə ağlaya, ağlamalı yerdə gülə də bilər.

 - "Kaş ki... ölkədə doğulaydım,... xalqın nümayəndəsi olaydım" dediyiniz olurmu?

- Yüz dəfə doğulmalı olsaydım, elə burada doğulmaq istərdim, pis dövründə də, yaxşı dövründə də...

- Evinizdə inciklik olurmu? Olursa, birinci kim barışır?

- İnciklik olur, küsüşmək olmur. Olsa, mən barışaram.

- Özünüzü kimin qarşısında günahkar bilirsiniz və kiminsə günahını bağışlamısınızmı?

- Heç kəsin qarşısında günahkar deyiləm. Kim bağışlanmasını istəsə, bağışlayaram.

- Sizcə, azadlıq istədiyini eləməkdir, yoxsa istəmədiyini?

- Azadlıq - cəmiyyət əxlaqı çərçivəsində istədiyin kimi yaşaya bilməkdir.

 - Sevgi nədir: ümid, qorxu, ya xoşbəxtlik?

- Sevgi ümid işığıdır.

- Ən çox nə zaman utanırsınız?

- Yaşlı adamlar yalan danışanda.

- Ölüm nədir?

- Ölüm geriyə dönmək - yenidən başlamaqdır.

- Çoxlu pulunuz olsa, hara xərclərdiniz?

- İnsanlara pul qazanmağı öyrətməyə xərclərdim.

- "Mən almasam, bir başqası alacaq, mən olmasam, başqası olacaq" düşüncəsi nəyi ifadə edir?

- İnsanın zəifliyini, tamahına bəraət qazandırmağını.

- Həyatda ən böyük təsəlliniz?

- Allah var, hər şeyi görür.

- Sizə hansı mövzuda sual verilməsini heç arzulamırsınız?

- Elə bir sual yoxdur. Cavabını bilmədiyim suallar da çoxdur.

- Yubiley və ad günlərində özünüzü necə hiss edirsiniz?

- Seldə axan adam kimi, tərsinə üzmək olmur.

- Dünyanın hər yerindən görünən uca bir lövhəyə iki-üç kəlməlik nəsihət yazmağı xahiş etsələr, nə yazardınız?

- Həyat budur, amma yaşamaq lazımdır.

- Sizə görə insanda ən yaxşı və ən pis xarakter hansılardır?

- Çalışıb minnətsiz yaşamaq. Günahı başqalarında axtarmamaq.

- Nə vaxtsa hansısa müğənniyə, sənətçiyə heyran, ya da aşiq olmusunuzmu?

- Sənətkara layiqincə hörmət bəsləmişəm. Heyranlıq, aşiqlik mənim işim deyil.

- Övladlarınız sizi atsalar, onlara nə deyərdiniz?

- Övladlarım məni nə qədər tez atsalar, o qədər çox sevinərəm. Təki özləri yaşamağı öyrənsinlər.

- Ən çox sevdiyiniz və sevmədiyiniz sözlər?

- Sözlər hamısı gözəldir, amma yerinə düşəndə.

- Fürsət olsa, ölümqabağı nə vəsiyyət edəcəksiniz?

- Yaşarkən çalışın, yaxşılıq edin.

- Ən çox nədən qorxursunuz?

- Mən qorxmuram ölümdən,

Qorxuram ki, mən

Ölmək lazım gələndə

Ölə bilməyəm.

- Xoşbəxt olmaq üçün nəyiniz çatmır?

- Olanım mənim üçün bəsdir.

- Sizin kimlərə və nə kimi xeyriniz var?

- Mən yaxşılıqla yaşayıram, bilmirəm bundan kimə nə xeyir dəyib.

 - Bu dünya bir insan şəklində qarşınızda dursa, ona nə deyərdiniz?

- Sən busanmış?! - deyərdim.

- Həyatınızda sizə təklif edilmiş nədənsə imtina etmisinizmi?

- Əqidəmə və əxlaqıma zidd olan hər şeydən imtina etmişəm.

- Gənclik hansı yaşda bitir?

- Ürək qocalanda.

- Dostlarınız çoxdurmu? İnsanlar niyə dost olurlar?

- Dostlarsız dünyada qərib olarsan. Mənim dostlarım azalıb, arada qəribsəyirəm.

Milli.Az