Cəmiyyət

Ər-arvad bir-birinin borcuna görə cavabdehdir?

26 Avqust 2026 13:32

Baxış: 430

VTB-də minimal faiz dərəcəsi ilə nağd kredit 9.9%-dən

#CƏMİYYƏT #AİLƏ

Ər-arvaddan birinin banka olan borcuna görə digər həyat yoldaşının gəlirinə və ya əmlakına tutma yönəldilə bilərmi? Son dövrlərdə bu məsələ xüsusilə bank borcları fonunda müzakirə olunur.

Milli.Az xəbər verir ki, hüquqşünas Əkrəm Həsənovun sözlərinə görə, belə hallarda nikah dövründə əldə olunan əmlakın hüquqi statusu mühüm rol oynayır.

Onun sözlərinə görə, məsələn, arvadın banka borcu olduğu, lakin özünün gəlirinin olmadığı halda, ərinin pensiyası müəyyən hallarda borcun ödənilməsi üçün nəzərə alına bilər:

"Ər-arvadın nikah dövründə əldə etdiyi gəlir və əmlak, bir qayda olaraq, onların birgə mülkiyyəti hesab olunur. Bu səbəbdən də borclunun həyat yoldaşının gəliri və ya əmlakı ilə bağlı məsələlər də ortaya çıxa bilər".

Ə.Həsənov qeyd edib ki, bu cür hallarda nikah müqaviləsi əhəmiyyətli hüquqi vasitədir. Tərəflər nikah müqaviləsi ilə gəlirlərinin və əmlaklarının ayrıca mülkiyyətə aid olmasını müəyyən edə bilərlər.

Hüquqşünasın sözlərinə görə, nikah müqaviləsi yalnız nikahdan əvvəl deyil, nikah dövründə də bağlana bilər. Hətta borcla bağlı icra prosesi başladıqdan sonra da belə müqavilənin bağlanması mümkündür:

"Əgər ər-arvad nikah müqaviləsi bağlayaraq hər birinin gəlirinin və əmlakının yalnız özünə məxsus olduğunu müəyyən edərsə, digər həyat yoldaşının borcuna görə bu əmlaka və gəlirə yönəlmənin qarşısını almaq mümkün ola bilər".

Beləliklə, Ə.Həsənov hesab edir ki, nikah müqaviləsi ər-arvadın əmlak münasibətlərinin tənzimlənməsində və gələcəkdə borc öhdəlikləri ilə bağlı yarana biləcək mübahisələrin qarşısının alınmasında mühüm rol oynaya bilər.

Müəllif: Mina Mikayılova (Milli.Az müxbir)