Su pulunuzun az gəlməsini istəyirsinizsə, bunu edin

Bir çox insan qab yuyan maşınların əlavə xərc yaratdığını düşünür. Xüsusilə su və elektrik sərfiyyatının yüksək olması ilə bağlı narahatlıqlar səbəbindən bəzi ailələr hələ də qabları əl ilə yumağa üstünlük verir.

Lakin müasir texnologiyalı qab yuyan maşınlarla bağlı aparılan araşdırmalar fərqli nəticələr ortaya qoyub. Məlum olub ki, düzgün istifadə edildikdə bu cihazlar həm su sərfiyyatını azalda, həm də elektrik enerjisinə qənaət edə bilər.

Müasir qab yuyan maşınların əsas üstünlüyü ondan ibarətdir ki, onlar suyu fasiləsiz şəkildə istifadə etmir. Cihaz xüsusi filtr sistemi vasitəsilə eyni suyu bir neçə dəfə dövriyyəyə buraxır və yalnız müəyyən mərhələlərdə yeni su əlavə edir.

Əl ilə yuma daha çox su tələb edir

Aparılan araşdırmalara görə, 14 nəfərlik qab dəstinin əl ilə yuyulması zamanı təxminən 63 litr su sərf oluna bilər.

Eyni həcmdə qablar müasir qab yuyan maşında əsas proqramla təxminən 13 litr su istifadə etməklə təmizlənir. "Eco" rejimində isə bu göstərici daha da aşağı düşür.

Bu isə o deməkdir ki, qab yuyan maşın bəzi hallarda əl ilə yuma ilə müqayisədə 80 faizdən çox suya qənaət edə bilir.

Qab yuyan maşın vaxta da qənaət edir

Almaniyanın Bonn Universitetinin alimlərinin müxtəlif ölkələrdə apardığı araşdırmalar zamanı da oxşar nəticələr əldə olunub.

Tədqiqat göstərib ki, insanlar qabları əl ilə yuyarkən orta hesabla 49 litr su sərf edir. Eyni miqdarda qablar isə maşında təxminən 13 litr su ilə yuyulur.

Bundan başqa, əl ilə qab yuma prosesi təxminən bir saat çəkdiyi halda, maşının doldurulması və boşaldılması üçün cəmi bir neçə dəqiqə kifayət edir.

Elektrik sərfiyyatı ilə bağlı yanlış fikir

Qab yuyan maşınların uzun müddət işləməsi bir çox istifadəçidə daha çox elektrik sərf etdiyi düşüncəsi yaradır. Lakin mütəxəssislər bildirirlər ki, proqramın uzun olması həmişə yüksək enerji sərfiyyatı demək deyil.

Əksinə, "Eco" rejimləri suyu daha aşağı temperaturda qızdırır və daha uzun müddət ərzində işləyərək enerjidən daha səmərəli istifadə edir.

Cihazlarda əsas enerji sərfiyyatı suyun qızdırılmasına gedir. Su miqdarı azaldıqca elektrik sərfiyyatı da aşağı düşür.

Qənaət üçün bu qaydalara əməl edin

Mütəxəssislər qab yuyan maşından daha səmərəli istifadə etmək üçün bir neçə tövsiyə verir:

Maşını tam dolmadan işə salmayın;
Qənaətli "Eco" proqramlarından istifadə edin;
Qabları əvvəlcədən axar su altında yumayın, yalnız iri qida qalıqlarını təmizləyin;
Daha az su və enerji sərf edən yeni modellərə üstünlük verin.

Araşdırmalar göstərir ki, qab yuyan maşınların çox su və elektrik sərf etdiyi fikri əsasən köhnə modellərdən qalan təsəvvürdür. Yeni nəsil cihazlar düzgün istifadə edildikdə həm kommunal xərcləri azaltmağa, həm də vaxta qənaət etməyə kömək edir.

Müəllif: Malik Məlikov (Milli.Az redaktor)