Bakının ən bahalı küçəsi bəlli oldu

Bakı son illər regionun ən sürətlə inkişaf edən şəhərlərindən birinə çevrildikcə paytaxtın bəzi küçələri də bahalı yaşayış və kommersiya məkanları kimi ön plana çıxmağa başlayıb. Xüsusilə şəhərin mərkəzi hissələrində yerləşən küçələrdə daşınmaz əmlakın və icarə haqlarının qiyməti sürətlə artaraq onları ölkənin ən bahalı ünvanlarına çevirib.

Milli.Az xəbər verir ki, əmlak eksperti Elnur Azadov Demokrat.az-a açıqlamasında bildirib ki, Bakıda ən bahalı küçələr sırasında Nizamı küçəsi və Parlament prospekti xüsusilə seçilir.

Onun sözlərinə görə, bu ərazilərdə qiymətlərin yüksək olmasının əsas səbəbi təklifin məhdud olmasıdır. Həmin küçələrdə satışa çıxarılan mənzil və ya obyekt tapmaq demək olar ki, qeyri-mümkündür. Binaların əksəriyyəti tarixi əhəmiyyət daşıyır və bu nadirlik faktoru qiymətləri süni şəkildə deyil, təbii tələbat hesabına yuxarı saxlayır.

"Bu küçələrdə qiymətlərin yüksək olmasının əsas səbəbi ərazidə çox az sayda mənzil və obyektin mövcud olmasıdır. Əksər binalar tarixi əhəmiyyətə malikdir və nadir hallarda satışa çıxarılır, bu da qiymətləri daha da artırır. Bundan başqa, İçərişəhər kimi mərkəzi və prestijli ərazilər də Bakının ən bahalı daşınmaz əmlak bölgələri sırasındadır. Burada həm tarixi irs, həm də turizm potensialı mənzil və kommersiya obyektlərinin qiymətini yüksək saxlayır. şəhərin mərkəzində, dənizkənarı və tarixi bölgələrdə qiymətlər həm ərazinin prestiji, həm infrastruktur, həm də nadirlik faktoru ilə bağlı olaraq yüksəlir. Bakıda ən bahalı küçələrin seçimi yalnız mərkəzi yerləşməyə deyil, həm də tarixi və nadir daşınmaz əmlakın mövcudluğuna bağlıdır".

Paytaxtın daşınmaz əmlak bazarındakı bu bahalaşma təkcə yerli amillərlə deyil, həm də Bakının beynəlxalq səviyyədə tanınan mərkəzə çevrilməsi ilə bağlıdır. Xüsusilə tarixi mərkəzdə və dəniz kənarında yerləşən mülklər artıq sadəcə daşınmaz əmlak deyil, həm də nəsildən-nəslə ötürülən qiymətli aktivlər hesab olunur. Ekspert qeyd edir ki, təklifin məhdudluğu və mərkəzdə yeni tikinti sahələrinin demək olar ki qalmaması bu küçələrdəki qiymətlərin gələcəkdə də artacağını proqnozlaşdırmağa əsas verir. Şəhərin simvoluna çevrilmiş bu ünvanlar həm prestij, həm də investisiya gəlirliliyi baxımından hələ uzun müddət öz liderliyini qoruyub saxlayacaq kimi görünür.

Milli.Az