Cəmiyyət

Azərbaycanda və dünyada gənclik anlayışı: Fərqlər nədir?

2 Fevral 2026 19:00

Baxış: 272

VTB-də minimal faiz dərəcəsi ilə nağd kredit 10.49%-dən

#MARAQLI

Cəmiyyətdə tez-tez müzakirə olunan məsələlərdən biri də "gənc" anlayışının hansı yaş aralığını əhatə etməsidir. Bu anlayış gündəlik danışıqda fərqli qəbul edilsə də, rəsmi sənədlərdə və dövlət siyasətində konkret yaş meyarları mövcuddur.

Bəs kimlər gənc hesab edilir?

Milli.Az xəbər verir ki, Azərbaycanda qüvvədə olan qanunvericiliyə əsasən, gənclər dedikdə 14 yaşından 29 yaşınadək olan şəxslər nəzərdə tutulur. Bu yaş həddi "Gənclər siyasəti haqqında" qanunda öz əksini tapıb və dövlət proqramları, layihələr, eləcə də sosial təşəbbüslər məhz bu kateqoriyaya yönəldilir.

Rəsmi yanaşmaya görə, 14-18 yaş arası şəxslər yeniyetmələr, 18-29 yaş aralığı isə gənclər qrupu kimi qiymətləndirilir. Bu kateqoriyaya daxil olan vətəndaşlar gənclər üçün nəzərdə tutulmuş təhsil, məşğulluq, sosial dəstək və beynəlxalq proqramlardan yararlanmaq imkanına malikdirlər.

Beynəlxalq təcrübədə isə "gənc" anlayışının yaş həddi ölkədən-ölkəyə dəyişir. Məsələn, Birləşmiş Millətlər Təşkilatı gəncləri adətən 15-24 yaş aralığında olan şəxslər kimi müəyyənləşdirir. Avropa İttifaqında isə bu göstərici bir sıra hallarda 30 və hətta 35 yaşadək uzadıla bilir.

Mütəxəssislər bildirirlər ki, gənclik təkcə yaş göstəricisi ilə deyil, sosial fəallıq, əmək bazarına inteqrasiya və ictimai həyata qoşulma mərhələsi ilə də xarakterizə olunur. Buna baxmayaraq, rəsmi sənədlərdə yaş meyarı əsas götürülür və hüquqi baxımdan müəyyənedici rol oynayır.

Qeyd edək ki, Azərbaycanda gənclər siyasəti dövlətin prioritet istiqamətlərindən biri hesab olunur və bu sahədə müxtəlif layihə və proqramlar icra edilir.

Aysel Əkbər
Milli.Az