Cəmiyyət

Qaxın yeni icra başçısı baş həkimin qardaşıdır - DOSYE

12 Noyabr 2025 14:00

Baxış: 3 876

VTB-də minimal faiz dərəcəsi ilə nağd kredit 9.9%-dən

#CƏMİYYƏT

Xəbər verdiyimiz kimi, Elvin Nazim oğlu Paşayev Göygöl Rayon İcra Hakimiyyətinin başçısı vəzifəsindən azad edilib.

Milli.Az xəbər verir ki, Prezident İlham Əliyev bu barədə Sərəncam imzalayıb. Dövlət başçısının digər Sərəncamı ilə Elvin Nazim oğlu Paşayev Qax Rayon İcra Hakimiyyətinin başçısı təyin edilib.

Bəs Elvin Paşayev kimdir?

Elvin Paşayev 27 iyul 1983-cü ildə anadan olub. Dövlət İqtisad Universitetində Maliyyə, Bakı Dövlət Universitetində Regionşünaslıq ixtisası üzrə təhsilini davam etdirib. Daha sonra Azərbaycan Milli Elmlər Akademiyasında doktorantura təhsili alıb. Yeni başçı 18 illik iş təcrübəsi dövründə Əmək və Əhalinin Sosial Müdafiəsi Nazirliyində kadrlar şöbəsinin sektor müdiri, Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyində İnsan resursları və təlim şöbəsinin müdiri vəzifələrində çalışıb.

Bununla yanaşı o, Dünya Bankı və Avropa Birliyinin layihələrində məsləhətçi-ekspert kimi işləyib. Elvin Paşayev Azərbaycan İnsan Resursları Assosiasiyası İctimai Birliyinin (AİRA) təsisçilərindən biridir.

Bugünkü təyinata qədər o, Kənd Təsərrüfatı Nazirliyinin Aparat rəhbərinin müavini vəzifəsində çalışıb. Prezident İlham Əliyevin 2020-ci il iyunun 23-də "Dövlət qulluqçularının təltif edilməsi haqqında" imzaladığı sərəncamına əsasən, uğurlu fəaliyyətinə görə təltif edilib.

Qeyd edək ki, Elvin Paşayev "Yeni klinika"nın baş həkimi Cavid Paşayevin qardaşıdır.

Aysel Əkbər
Milli.Az