Universitetlərə getmək səbəbi artıq dəyişib - Təhsil yoxsa trendlər?

Son dövrlərdə universitetlərdə təhsil almaqla yanaşı sosial media üçün kontent yaratmaq və "universitet həyatı"nı şouya çevirmək kimi yeni bir yanaşma ortaya çıxıb. Təəssüf ki, bu yanaşma çox zaman təhsilin əsas məqsədini kölgədə qoyur və gəncləri yalnız əyləncəyə yönəldir. Universitetlər, əslində, gənclərin bilik əldə etdiyi, intellektual inkişaf etdiyi və akademik mühitdə böyüdüyü yerdir. Lakin bu gün bir çoxları universiteti yalnız əyləncə və sosial həyatın mərkəzi kimi görür. Bu, təhsil sistemimizin gələcəyini ciddi şəkildə təhdid edən bir yanaşmadır.

Milli.Az xəbər verir ki, mövzu ilə bağlı təhsil eksperti Kamran Əsədov deyib ki, ali təhsilin mahiyyətini tamamilə unutmuşuq.

"Universitet əyləncə mərkəzi deyil, buraya gənclər öyrənmək, araşdırmaq, bilik qazanmaq üçün gəlirlər. Ancaq indi elə bil ki, əsas məqsəd təhsil almaq deyil, sosial media üçün kontent yaratmaq, "trendlərə düşmək" və ya "universitet həyatını" şouya çevirməkdir.

Bunu normal hesab edənlər anlamır ki, universitetin bir imici, akademik dəyəri və elmi mühiti var. Hər yerin bir qaydası var - teatrda səssiz oturursan, məsciddə sayğılı davranırsan, xəstəxanada nizam-intizama əməl edirsən. Bəs universitet?

Ali təhsil müəssisəsinə girən hər kəs anlamalıdır: sən burada bir akademik mühitin içindəsən, hərəkətlərin yalnız səni deyil, bütövlükdə ali təhsil sisteminin nüfuzunu təyin edir! Əylənmək başqa şeydir, universitetin mövcud akademik mühitini pozacaq şəkildə davranmaq başqa şey. Bu qəbulolunmazdır!"

Ekspert qeyd edib ki, əgər universitetlərdə bilikdən çox əyləncə prioritet olursa deməli, biz diplom verən bir sistem qurmuşuq, amma elmi düşüncə və intellektual inkişaf verən bir sistem qura bilməmişik. Bunun nəticəsində də təhsilimiz beynəlxalq reytinqlərdə yer tapmır, məzunlarımız real bilik və bacarıqdan məhrum olur. Çünki universitet dəyərini itirəndə oradan çıxan "təhsilli" insanların da dəyəri azalır!

Asya
Milli.Az