22 yaşlı Könülü boğazında naqillə basdırıblar... - YENİLƏNİB - FOTO

Xəbər verdiyimiz kimi, 70 gün öncə itkin düşən Cəlilabad rayonu, Muğan kənd sakini, Azərbaycan Dövlət Pedaqoji Universitetinin dördüncü kurs tələbəsi Könül Ramin qızı Ağayevanın Lənkəranda evin zirzəmisində meyiti aşkar edilib. Məlum olub ki, Könül amansızcasına qətlə yetirilərək basdırılıb.

Könül Ağayevanın oxuduğu Pedaqoji Universitetinin Cəlilabad filialından Metbuat.az-a bildirilib ki, tələbə 16 fevraldan dərslərə gəlməyib və onunla əlaqə saxlamaq mümkün olmayıb:

"Tələbə yanvarda imtahanlarda iştirak edib. Lakin imtahanlardan sonra - ikinci semestrdə dərsə gəlməyib artıq. 4 dənə kəsri var idi, alt qrupda oturmalı idi. İkinci semestr başlayandan - 16 fevraldan bu tələbə ilə əlaqə saxlaya bimədik. Dərslərdə də qaib yazılırdı".

Qeyd edək ki, ilkin məlumatlarda 22 yaşlı Könül Ağayevanın işləmək məqsədilə Lənkərana gəlməsi, bu ilin martın 2-dən itkin düşdüyü bildirilib. Hazırda Lənkəran rayon Prokurorluğu hadisəni törədən şəxsin və ya şəxslərin müəyyən edilməsi istiqamətində araşdırma aparır.

--------

12:51

Təxminən 70 gün əvvəl itkin düşmüş və dünən Lənkəranda meyiti tapılan 22 yaşlı Könül Ağayeva tələbə imiş.

Milli.Az qafqazinfo-ya istinadən xəbər verir ki, nəşi Lənkəranda yaşayış olmayan evin zirzəmisində tapılan K.Ağayeva Azərbaycan Dövlət Pedoqoji Universitetinin Cəlilabad filialının Azərbaycan dili və ədəbiyyatı müəllimliyi ixtisasının 4-cü kurs tələbəsi olub.

O da məlum olub ki, Cəlilabad rayon Muğan kənd sakini olan K.Ağayeva boğularaq qətlə yetirilib. Onun meyiti Lənkəran şəhəri Hacı Zeynalabdin Tağıyev küçəsində evin zirzəmisində basdırıldığı yerdən çıxarılarkən boğaz nahiyəsində naqil olub.

Hadisənin kim tərəfindən, hansı zəmində törədilməsi hələlik məlum deyil.

Faktla bağlı araşdırmalar davam etdirilir.

Qeyd edək ki, ilkin məlumatlarda 22 yaşlı qızın işləmək məqsədilə Lənkərana gəldiyi, bu ilin martın 2-dən isə itkin düşdüyü bildirilib.

-------

12:15

Ötən gün Lənkəranda meyiti tapılan 2002-ci il təvəllüdlü Ağayeva Könül Ramin qızı Azərbaycan Dövlət Pedaqoji Universitetin (ADPU) Cəlilabad filialının tələbəsi olub.

Milli.Az bildirir ki, İqtisadiyyat.az-ın əldə etdiyi məlumata görə, o, ali təhsil müəssisəsinin Azərbaycan dili və ədəbiyyatı müəllimliyi ixtisası üzrə 4-cü kursda oxuyurmuş.

K.Ağayeva əvvəllər Lənkəran Dövlət Universitetində (LDU) təhsil alıb. Cəlilabad rayon Muğan kənd sakini olan qadın daha sonra ADPU-nun bu rayonda yerləşən filialına transfer olunub və təhsilini burada davam etdirməyə başlayıb.

Qeyd edək ki, K.Ağayeva bu ilin martın 2-də itkin düşüb. Onun itkin düşməsi ilə bağlı polisə məlumat verilib. İki aydan çoxdur itkin düşən qadının meyiti ötən gün Lənkəran rayonu, Hacı Zeynalabdin Tağiyev küçəsi 1-ci döngədə yerləşən evin həyətində tapılıb. 

Hazırda fakt üzrə araşdırmalar davam etdirilir.

--------

11:06

Azərbaycan Dövlət Pedaqoji Universitetinin (ADPU) Cəlilabad filialının tələbəsi Könül Ramin qızı Ağayeva vəfat edib.

Milli.Az xəbər verir ki, bu barədə ADPU məlumat yayıb.

Bildirilib ki, o, universitetin "Azərbaycan dili və ədəbiyyatı müəllimliyi ixtisası"nın 4-cü tədris ilinin tələbəsi olub.

Milli.Az
Xəbərlərimizi WhatsApp kanalımızdan da oxuyun