Bərdədə zona baytarlıq laboratoriyası tikilib

Milli.Az EL TV-yə istinadən xəbər verir ki, Bərdə rayonunda müasir tələblərə cavab verən yeni Zona baytarlıq laboratoriyası tikilib.

Laboratoriya binasının ətrafında su hovuzu, ventilyasiya sistemi inşa edilib. Daimi enerji təminatını ödəmək üçün elektrik paylayıcı yarımstansiya, enerji kəsilməsi olduqda isə üç saniyədə avtomatik işə düşən generator quraşdırılıb.

Baytarlıq laboratoriyası Amerika hökumətinin maliyyə dəstəyi hesabına tikilib. İndiyə kimi binanın inşasına iki milyon 500 min dollar xəcrclənib. Bunun 1 milyon 500 mini ümumi binanın inşaat işlərinə xərclənilib. 1 milyon dollar məbləğində isə ən son texnologiyalar əsasında istehsal edilən laboratoriya avadanlıqları alınıb.

Laboratoriya bir neçə rayona baytarlıq xidməti göstərəcək. Yeni inşa edilən bina 4 əsas şöbədən ibarətdir. Buraya Bakterologiya, Serologiya, Virusologiya, Toksologiya şöbələri daxildir.

Qeyd edək ki, rayondakı köhnə laboratoriyada əvvəllər yalnız bruselyoz, qarayara, qoyunlarda bradzot, quşlarda isə pasterloz və aksendroz xəstəlikləri müayinə edilirdi. Quduzluq, dabaq kimi xəstəliklərin müayinəsi isə respublika baş baytarlıq laboratoriyasına
göndərilib. Yeni binada isə müasir tələblərə cavab verən baytarlıq cihazları quraşdırılıb.

Bərdə Zona baytarlıq laboratoriyasının müdiri Aydın Məmmədovun sözlərinə görə, bu avadanlıqların vasitəsi ilə bütün xəstəliklərin paytaxta göndərilmədən qısa müddət ərzində təyin olunması mümkün olacaq. Həmçinin, fəaliyyət göstərən şöbələrdə də təyinatı üzrə müasir avadanlıqlar qurulub. Müasir aparatlarda işçilərin hər hansı bir virusa yoluxmasının qarşısını almaq üçün xüsusi lazer dezinfeksiyası var.

Yeni laboratoriyada binanın və işçilərin ümumi təhcizatı dəqiqliklə nəzərə alınıb. Binada ən son qazanxana və siqnalizasiya sistemi qurulub. Bir neçə gündən sonra işçilərə hər bir şöbəni fərqləndirən geyimlər payalanılacaq. Bakteriologiya qırmızı, Serologiya göy, Virusologiya sarı, Toksikologiya şöbəsinin işçiləri isə ağ geyimlərdə olacaqlar. İş gününün sonunda isə həmin geyimlər polietilen kisələrə qoyularaq buxar sobası vasitəsi ilə dezinfeksiya ediləcək.

Milli.Az