İlkin Həsəni jurnal yaradır

Milli.Az xəbər verir ki, Azərbaycanın ilk oyun və texnologiya dərgisi yaradılır. Dərgi "Evolution", yəni təkamül adlanır. "Evolution" dərgisinin önümüzdəki ilin fevral - mart aylarında Azərbaycan bazarında öz yerini tutacağı gözlənilir. Buna baxmayaraq, dərgi öz fəaliyyətlərinə artıq başlayıb. Belə ki, sosial şəbəkələrdə (instagram, facebook) "Evolution" adı altında yavaş-yavaş öz fəaliyyətinə başlamış dərgi, bundan başqa müxtəlif vakansiyalar üzrə iş yerlərinin elanını da verib. Kontent hazırlanması üzrə mütəxəssislərin toplanmasına başlayan dərgi heyəti 24 noyabr 2013 tarixində New Baku otelinin konfrans salonunda həvəskarlarla görüş keçirəcək.

Görüşün mahiyyəti haqqında danışan lahiyə rəhbəri və təşkilatçı şirkət "İlk Media" şirkətinin rəhbəri İlkin Həsəninin sözlərinə görə, bu görüş yepyeni və bu sahəyə layiqli bir dərgi ortaya çıxarmaq üçün onlara məqalə yazanlar arasında seçim etməyə imkan tanıyacaq. "Gözəl dərgi, maraqlı və oxuna biləcək məqalələr yazmaq üçün bu sahənin həvəskarları ilə görüş vacibdir", - deyə vurğulayan İlkin Həsəni dərginin oyun və texnologiya sahələrini birləşdirən və habelə Azərbaycanda oyun sahəsində də fəaliyyət göstərən ilk dərgi olacağını vurğulayaraq dilə gətirib.

Dərgi haqqında öz düşüncələrini dilə gətirənlərdən biri də dərginin baş redaktor vəzifəsində olan və dərginin dizayn işlərini üstlənmiş "Butterfly" MMC şirkətinin rəhbəri Vüqar Alışov oldu. Onun sözlərinə görə "Evolution" dərgisində bu sahədə fəaliyyət göstərmiş xarici bir çox dərginin təcrübəsindən yararlanacaqlar. Vüqar Alışov özü Türkiyənin məşhur texnologiya dərgilərində işlədiyi üçün dizayn mövzusunda "Avropa və yaxın şərq ölkələrində fəaliyyət göstərən dərgilərdən heç də geri qalmayacaq" sözlərini söyləyib. Hal-hazırda bütün fəaliyyətlərinin və diqqətlərinin həvəskarlarla görüşə yönəldiyini söyləyən baş redaktor son olaraq dərginin ən son texnologiyalara və keyfiyyət baxımından ən yüksək tələblərə uyğun olacağını vurğulayıb.

Milli.Az