Birgə çalışmaq istəmədiyi bacısı ona görə milyonlar itirdi - FOTO

Müğənni Canet Cekson yeni "Janet Jackson" adlı sənədli filmində mərhum qardaşı, pop ulduz Maykl Ceksonla bağlı xatirələrindən söz açıb.

Milli.Az axşam.az-a istinadən xəbər verir ki, ifaçı artıq çəkisinə görə qardaşı tərəfindən necə lağa qoyulduğunu və ona xoşagəlməz ləqəblər tapdığını açıqlayıb.

Buna baxmayaraq o, uşaqlıqda qardaşı ilə çox yaxın olduqlarını, gənclik dövründə isə istehzalı sözlərinə dözməli olduğunu bildirib. "Maykl bacısının artıqçəkili olduğuna görə ona gülür və Caneti madyan, donuz adlandırırdı. Həmin vaxtlar çəki atmağa çalışan Canet üçün bu sözlər çox ağrılı olub" deyə, yazıda bildirilib..

Sonradan onların münasibəti soyumağa başlayıb. Canet etiraf edib ki, Maykl populyarlıq qazanan kimi ondan uzaqlaşmağa, tədricən isə ümumiyyətlə, ünsiyyət saxlamamağa başlayıb. Soyuq münasibətə rəğmən, onlar bərabər çalışmalı olurdu. Canet xatırlayır ki, "Scream" klipinin çəkilişləri zamanı onlar növbə ilə çalışıb. Maykl çəkiliş zamanı bacısının meydançaya buraxılmamasını tələb edirmiş.

Münasibətlərin bitməsinə baxmayaraq, Canet qardaşının reputasiyasından zərər çəkib. 1993-cü ildə Maykl Cekson ilk dəfə pedofillikdə ittiham ediləndə Canet ona dəstək olmağa çalışsa da, bunun əvəzini öz reklam müqavilələri ilə ödəməli olub. Belə ki, o, məşhur şirkətlərdən biri ilə müqavilə bağlamaq istəsə də, qardaşı ətrafında yaranan qalmaqala görə onunla çalışmaqdan imtina ediblər.

"Mən çox üzülmüşdüm. Hərəmizin öz həyatı var. Əlbəttə, o mənim qardaşımdır, lakin bu məsələnin mənə heç bir aidiyyəti yox idi" - deyə, Canet əlavə edib.

Maykl Cekson hamısını inkar etsə də, ömrünün son günlərinədək pedofillikdə ittiham olunub. O, 2009-cu ildə 50 yaşında dünyasını dəyişib.

Qeyd edək ki, pop-ulduza qarşı son ittihamlar ölümündən sonra, 2019-cu ildə irəli sürülüb. "Leaving Neverland" sənədli filmi Sundance Film Festivalında təqdim olunub. Orada iki kişi uşaqlıqda musiqiçinin Neverlanddakı malikanəsini ziyarət etdiklərini və orada Maykl tərəfindən təcavüzə məruz qaldıqlarını iddia ediblər. Sənədli film böyük ictimai rezonansa və mediada geniş reaksiyaya səbəb olub.

Milli.Az