Azərbaycanda populyar radionun yayımı niyə dayandırıldı? - RƏSMİ AÇIQLAMA

Antenn 101 FM-in Tovuz-Qazax bölgəsində yayımı dayanıb.

İlkin Məmmədov adlı oxucu Milli.Az-a məktub göndərərək, yayımın dayandırılmasının səbəbini bilmək istəyib:   

"Tovuz-Qazaxbölgəsi üçün radio dalğasında ümumilikdə 6 FM var. Bunlardan da biri Antenn 101 FM-dir. Artıq 7 avqust tarixindən etibarən radioda bu kanalı dinləyə bilmirik. Ona görə də kanalın hansı səbəbdən dayandırıldığını bilmək istəyirik".

Qeyd edək ki, məsələ ilə bağlı Antenn 101 FM-in rəsmi saytında hər hansı qeyd yoxdur. Saytda radio kanalın bütün bölgələr üzrə əhatə dairəsini bildirən hissə var. Burada Qazax bölgəsi üçün yayım tezliyi 100 FM olaraq qalır.

Milli.Az olaraq Radio Antenn 101 FM-ə sorğu ünvanladıq. Sorğuya cavab olaraq, radionun əməkdaşı Çinarə Cəfərova yayımın dayandırıldığını təsdiqləyib və bunun müvəqqəti olduğunu bildirib:

"Həmin bölgə ilə bağlı yayım avadanlıqlarında profilaktik təmir işləri gedir. Bu yenilənmə ilə əlaqədar yayım müvəqqəti olaraq dayandırılıb. Təmir işləri bitdikdən sonra isə yayım bərpa olunacaq".

Radionun sözçüsü yayımın nə zaman bərpa olunacağı haqqında dəqiq tarix bildirməyib.

Afaq Rza
Milli.Az