Siyasət

Azərbaycanda terror-təxribat və digər cinayət əməlləri törədən 14 erməninin növbəti məhkəmə prosesi iyunun 25-nə təyin edilib - FOTO - YENİLƏNİB

16 İyun 2021 17:28
Baxış: 1 754

17:28

Bakı Ağır Cinayətlər Məhkəməsində Azərbaycanda terror-təxribat və digər cinayət əməlləri törədən 14 nəfərlik erməni silahlı dəstələrinin üzvlərinin işi üzrə məhkəmə prosesi keçirilib.

Milli.Az Trend-ə istinadən xəbər verir ki, prosesdə təqsirləndirilən şəxslərin vəkilləri məhkəmə iclasında çəkiliş aparılmasının qadağan edilməsi barədə vəsatət qaldırsa da, hakim vəsatəti təmin etməyib. Prosesdə video və audio çəkilişə icazə verilib.

Daha sonra məhkəmə tərkibi təqsirləndirilən şəxslərə təqdim edilib. Təqsirləndirilən şəxslər hakim tərkibinə etiraz etməyib.

Məhkəmə təqsirləndirilən şəxslərin hüquqlarını elan edib. Bildirib ki, təqsirləndirilən şəxslər ifadə verməkdən imtina edə və sərbəst ifadə verə bilər.

Hakim bildirib ki, təqsirləndirilən şəxsin hər biri ana dilində ifadə verə və tərcüməçidən istifadə edə bilər, məhkəmə materialları ilə tanış olmaq, məhkəmə baxışında ifadə verməklə son sözlə çıxış etməlidir.

Prosesdə təqsirləndirilən şəxslərə onların hüquqları barədə yaddaş kitabçası paylanılıb.
Vəkil vəsatət qaldırıb ki, təqsirləndirilən şəxslər 2020- cil 13 dekabr ayında saxlanılıb və barələrində həbs qətimkan tədbiri seçilib. Amma onların həbs müddəti yanvar və fevral ayından hesablanıb. Vəkil bildirib ki, saxlanılan şəxslərin həbs müddəti dekabr ayından hesablansın.

Vəsatətə münasibət bildirən dövlət ittihamçısı bildirib ki, təqsirləndirilən şəxslər dekabr ayında saxlanılsa da, dindirilmədən sonra onlara ittiham elan edilib. Həmin şəxslərin bəzilərinə yanvar, bəzilərinə isə fevral ayında ittiham elan olunub və barələrində həbs qətimkan tədbiri seçilib.

Məhkəmə müşavirəyə yollanıb.

Müşavirədən sonra məhkəmə vəsatəti rədd edib. Daha sonra hazırlıq iclasının qərarı elan olunub. İş üzrə hazırlıq iclasının başa çatdığı bildirilib və məhkəmə prosesi iyunun 25-nə təyin edilib.

-------

14:25

Bakı Ağır Cinayətlər Məhkəməsində Azərbaycanda terror-təxribat və digər cinayət əməlləri törədən 14 nəfərlik erməni silahlı dəstələrinin üzvlərinin işi üzrə məhkəmə prosesi başlayıb.

Milli.Az Trend-ə istinadən bildirir ki, hakim Əfqan Hacıyevin sədrliyi ilə keçirilən hazırlıq iclasında dəstə üzvləri Serobyan Geğam Samveloviç, Avakyan Qraç Arzumanoviç, Baqasyan Armen Yegizari, Qasparyan Qor Vaqramini, Sefilyan Kamo Karenoviç, Hakobyan Volodiya Vaçaqani, Asertyan Gevorq Norairoviç, Yenqoyan Sisak Qrişai, Petrosyan Albert Komiyeviç, Sedrakyan Romik Misakini, Minosyan Aram Qarnikoviç, Minosyan Mkrtıç Simonoviç, Matesyan Edqar Vaçaqanoviç, Karapetyan Yuri Tiqranoviçin anket məlumatları dəqiqləşdirilib.

Qeyd edək ki, 10 noyabr 2020-ci ildə Azərbaycan, Rusiya və Ermənistan arasında imzalanmış üçtərəfli bəyanatla atəşkəsin elan olunmasından sonra Azərbaycan Respublikasının ərazisinə qanunsuz olaraq gizli yollarla keçib Xocavənd rayonunun Hadrut qəsəbəsinin şimal-qərb hissəsində meşəlik ərazidə mövqe tutaraq hərbi qulluqçularımıza və mülki şəxslərə qarşı terror-təxribat və digər cinayət əməlləri törədən erməni silahlı dəstələrinin Dövlət Təhlükəsizliyi Xidməti tərəfindən 13 dekabr 2020-ci il tarixdə keçirilmiş anti-terror əməliyyatı nəticəsində tərksilah edilmiş üzvləri barəsində DTX-nin İstintaq Baş idarəsində başlanmış cinayət işi üzrə ibtidai istintaq yekunlaşıb.

Aparılmış istintaqla müəyyən edilib ki, Ermənistan Respublikasının vətəndaşlarından ibarət bir qrup şəxs qanunsuz şəkildə odlu silah, onun komplekt hissələrini, döyüş sursatı, partlayıcı maddələr və qurğular əldə edərək qanunvericiliklə nəzərdə tutulmayan silahlı birləşmələr yaratmışlar. Həmin birləşmələrin üzvləri 26-27 noyabr 2020-ci il tarixdə Azərbaycan Respublikasının dövlət sərhədini qanunsuz olaraq mütəşəkkil dəstə halında keçməklə Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq 13 dekabr 2020-ci il tarixədək olan müddət ərzində ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar etmiş, ictimai təhlükəsizliyi pozmaq, əhali arasında vahimə yaratmaq, Azərbaycan Respublikasının dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.

Sadalanan faktlarla bağlı qanunsuz silahlı birləşmənin üzvləri Avakyan Qraç Arzumanoviç, Serobyan Geğam Samveloviç və digərlərinin, ümumilikdə 14 təqsirləndirilən şəxsin Azərbaycan Respublikası Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunmalarına dair cinayət işinin istintaqı yekunlaşdırılaraq Azərbaycan Respublikası Baş Prokurorunun müavini tərəfindən təsdiq edilmiş ittiham aktı ilə birlikdə baxılması üçün məhkəməyə göndərilib.

Milli.Az 

Məqaləyə dair fotomateriallar:

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.